شىمكەنت قالاسىنا جۇمىس ساپارىمەن بارعان مادەنيەت جانە اقپارات ءمينيسترى ايدا بالاەۆا جاستار سارايىندا قالا تۇرعىندارىمەن كەزدەستى. جۇزدەسۋ بارىسىندا ا.بالاەۆا پرەزيدەنت تاپسىرماسىمەن جۇرگىزىلىپ جاتقان رەفورمالار مەن سونىڭ اياسىنداعى سالانىڭ نەگىزگى جوبالارى جايىندا كوپشىلىككە بايانداپ, سول بويىنشا اتقارىلعان جۇمىستاردىڭ قورىتىندىسىن جاريالادى.
مينيستر ءوز بايانداماسىندا ەلىمىزدەگى اقپارات كەڭىستىگىن ساقتاۋ ماسەلەسىن قوزعادى. اسىرەسە ول شەكارالاس ايماقتاعى تۇرعىنداردىڭ وتاندىق راديو-تەلەۆيزيالىق تاراتىلىمدارعا قول جەتكىزۋ ماسەلەسىنە نازار اۋداردى. ويتكەنى شەكاراعا جاقىن ورنالاسقان كوپتەگەن ەلدى مەكەندە كورشىلەس ەلدىڭ راديوسى مەن تەلەۆيزياسى ەمىن-ەركىن تاراتىلىپ جاتادى. وسى جاعدايدى رەتتەۋ ءۇشىن مينيسترلىك ارنايى جۇمىستاردى قولعا الىپ, «شالقار» مەن «قازاق راديوسىنىڭ» ءۇنىن سوناۋ شەكارا ايماعىنداعى اۋىلدارعا دەيىن جەتكىزبەك.
ا.بالاەۆا بۇگىنگى تاڭدا پروكاتقا شىعارىلىپ جاتقان كينوفيلمدەر تۋرالى دا پىكىر ءبىلدىردى. ونىڭ سوزىنشە, وسى كۇندە كينوتەاترلاردا كورسەتىلىپ جۇرگەن وتاندىق فيلمدەر كەرەمەت دەپ ايتۋعا كەلمەيدى. كەيدە فيلم سيۋجەتىندە بەيادەپ سوزدەر, ورىنسىز قىلىقتار كەزدەسىپ قالىپ جاتادى. كوركەم فيلم – ءبىرىنشى كەزەكتە حالىقتى تاربيەلەۋشى يدەولوگيالىق قۇرال. سول سەبەپتى ونىڭ قوعامداعى ءرولى ءاردايىم كۇشتى بولۋ كەرەك. وسى ورايدا ا.بالاەۆا مينيسترلىك جانىنان ارنايى كەڭەستىك توپ قۇرىلىپ, ءاربىر تۇسىرىلگەن وتاندىق كينوفيلمدەر سۇزگىدەن وتكىزىلەتىنىن جەتكىزدى. سونىمەن قاتار مينيستر تەاترلاردا دا بولاشاق سپەكتاكلدىڭ مازمۇنىن سارالاپ, كەم-كەتىك جەرى بولسا, دۇرىس ارناعا بۇرىپ وتىراتىن كوركەمدىك كەڭەستىڭ بولعانىن قۇپتادى.
سونىمەن قاتار مينيستر ەلىمىزدە اقپاراتتىڭ قولجەتىمدىلىگىن دە ءسوز ەتتى. ياعني كەيبىر مەملەكەتتىك قۇپيا بولىپ سانالاتىن دەرەكتەردەن بولەك, كەز كەلگەن سالادا اقپارات كوزى اشىق. اسىرەسە باق وكىلدەرىنىڭ مەملەكەتتىك ورگانداردان مالىمەت الۋ جاعى وڭايلاستىرىلعان. بۇل ەلىمىزدەگى دەموكراتيالىق قاعيداتتاردىڭ سالتانات قۇرعانىن بىلدىرەدى. ال مينيسترلىك بيىل كۇشىنە ەنگەن جاڭا ەرەجەگە سايكەس وسى ۇدەرىستەردى زاڭ شەڭبەرى اياسىندا باقىلاۋدا ۇستايدى.
بۇدان وزگە, ا.بالاەۆا شىمكەنتتە رەسپۋبليكالىق ماڭىزى بار 7 تاريحي ەسكەرتكىش بارىن اتاپ ءوتىپ, ولاردىڭ ينفراقۇرىلىمىن جاقسارتۋ, قوسىمشا قارجى ماسەلەسىن شەشۋ باعىتىندا جۇمىس جۇرگىزىلەتىنىن جەتكىزدى. سونىڭ ىشىندە «شىمقالا» تاريحي-مادەني كەشەنىنە ەرەكشە توقتالدى. اتالعان اۋماقتا تالاي ارحەولوگيالىق قۇپيا-سىرلار جاتقانىن ايتا كەلە, قازبا جۇمىستارى مەن زەرتتەۋلەر ءالى دە جالعاسا تۇسەتىنىن مالىمدەدى.
اشىق ديالوگ بارىسىندا شىمكەنت تۇرعىندارى كوكەيكەستى سۇراقتارىن قويىپ, تولىق جاۋاپ الدى. تۇرعىندار قويعان ساۋالداردىڭ ىشىندە تالانتتى جاستاردىڭ جەكە ىزدەنىستەرىنە اقپاراتتىق قولداۋ كورسەتۋ, ولاردىڭ باستامالارىن ناسيحاتتاۋ, ۇجىمدىق كونتسەرتتىك مەكەمەلەردىڭ قاۋىپسىزدىگىن قامتاماسىز ەتۋ, شىمكەنتتە مادەنيەت سالاسىنداعى جەكە جوعارى وقۋ ورنىن قۇرۋ, جاستاردى, وتباسىلاردى وڭتۇستىكتەن سولتۇستىك وڭىرلەرگە قونىس اۋدارۋعا ۇگىتتەۋ, ول ءۇشىن سەزىمگە قۇرىلعان قىزىقتى كوركەم فيلمدەر ءتۇسىرۋ سەكىلدى ءوتىنىش-تىلەكتەر, ۇسىنىستار ايتىلدى. مينيستر ءوز سوزىندە ايتىلعان ماسەلەلەر نازاردان تىس قالمايتىنىن, ءتيىستى شەشىمدەر قابىلداناتىنىن مالىمدەدى.
كەزدەسۋدەن كەيىن مينيستر جەكە قابىلداۋ وتكىزىپ, تۇرعىنداردىڭ ساۋالدارىن تىڭدادى.
ايدا بالاەۆانىڭ ساپارى باق وكىلدەرىمەن وتكەن بريفينگپەن قورىتىندىلاندى. وندا مەديا, جاستار ساياساتى جانە مادەنيەت سالاسىنداعى وزەكتى ماسەلەلەر ايتىلدى.
شىمكەنت