بۇگىن استانا قالاسىنداعى «نۇرلى جول» ۆوكزالىندا ەل شەكاراسىنىڭ شەگەندەلگەنىنە 33 جىل تولۋىنا وراي فوتوكورمە ءوتتى. بابادان قالعان بايتاق دالانى كىرپىك قاقپاي كۇزەتەتىن قىراعى قىزمەتتىڭ سان قىرى تاسپالانعان سۋرەتتەردى اعا لەيتەنانت اسحات سابيەۆ تۇسىرگەن. ول 15 جىلدىق ەڭبەك جولىندا قارۋ مەن فوتواپپاراتتى قاتار ۇستاعان, دەپ جازادى Egemen.kz.
قازاقستان شەكاراسى الەمدەگى ەڭ ۇزىن قۇرلىق شەكارالارىنىڭ ءبىرى. ال قازاقستان مەن رەسەي شەكاراسى الەمدەگى ەڭ ۇزىن ۇزدىكسىز قۇرلىق شەكاراسى بولىپ سانالادى. وسىنداي ۇلان-عايىر القاپتى قورعاۋ شەكاراشىلارعا جۇكتەلگەن نەگىزگى مىندەت. تاۋ مەن تاس, وزەن, كولىك, جازىق, قۇمدا قالعىمايتىن شەكاراشىلاردىڭ قىزمەتى فوتوكورمەدە ايقىن كورسەتىلگەن. ا. سابيەۆ وسىنداي جاۋاپتى مىندەتتى ەڭسەرە ءجۇرىپ, قولىنان فوتواپپاراتىن تاستاماعان. بۇگىن ول جىلدار بويى وبەكتيۆىنە ىلىكتىرگەن تاڭداۋلى 33 سۋرەتىن كورەرمەن نازارىنا ۇسىندى.
«مەنىڭ ماقساتىم وتان شەبىن قورعاپ جۇرگەن شەكاراشىلاردىڭ ەڭبەگىن نانىمدى ناسيحاتتاۋ. ال بۇگىنگى كورمەگە شەكارا قىزمەتىنىڭ قالىپتاسۋ تاريحىن كەزەڭ-كەزەڭىمەن ءۇنسىز-اق تۇسىندىرەتىن تۋىندىلاردى قويدىق. كۇندەلىكتى قىزمەتتى, اقىل-وي كۇشىن جانە زاستاۆالاردان تىس جەردە سيرەك كەزدەسەتىن ادالدىقتى كورسەتۋگە كوڭىل قويامىن», دەيدى اسحات سابيەۆ.
جانكەشتى جۇمىس بارىسىن بەينەلەيتىن ەكسپوزيالاردىڭ اۆتورىنا فوتو ونەردىڭ قىر-سىرىن ۇستازدارى تامارا داۋلەتپاەۆا مەن راديك كاگەنوۆ ۇيرەتىپتى. وتان قورعاۋ سىندى ابىرويلى قىزمەتتە قوسىشا سۇيىكتى ءىسىن قابىستىرا العان اعا لەيتەنانت باعىت بەرگەن ۇستازدارىنا, شىعارماشىلىق پروتسەسكە قۇرمەتپەن قارايتىن ارىپتەستەرىنە ريزاشىلىعىن ءبىلدىردى.
فوتوكورمەنى ارداگەر شەكاراشىلار, 16 مەكتەپتىڭ «جاس شەكاراشىلار» اسكەري پاتريوتتىق كلۋبى, قالا تۇرعىندارى مەن قوناقتارى تاماشالادى.