قازاق دالاسىن اۋەنمەن تەربەتكەن سازگەر ءشامشى قالداياقوۆ 1930 جىلدىڭ 15 تامىزىندا وڭتۇستىك قازاقستان وبلىسىنىڭ وتىرار اۋدانىندا دۇنيەگە كەلگەن. ونىڭ اندەرى ەلدىڭ تۇكپىر-تۇكپىرىندە ءجيى شىرقالىپ, ونەرسۇيەر جۇرتشىلىق اراسىندا كەڭىنەن تاراعان, دەپ جازادى Egemen.kz.
«قازاق ءۆالسىنىڭ كورولى» اتانعان سازگەر 40 جىلدان استام شىعارماشىلىق قىزمەتىندە 300-گە جۋىق مۋزىكالىق تۋىندى جازدى. كومپوزيتور 1965 جىلى قازاقستان كومسومول سىيلىعىن الدى. 1991 جىلى وعان قازاقستان رەسپۋبليكاسىنىڭ حالىق ءارتىسى قۇرمەتتى اتاعى بەرىلدى.
كومپوزيتور شىعارمالارىنىڭ تاقىرىپتىق, مازمۇندىق اۋقىمى اسا كەڭ. ەلگە, جەرگە, وتانعا, اتا-اناعا, جارعا, دوس-جارانعا دەگەن سۇيىسپەنشىلىك ءشامشى شىعارمالارىنىڭ باستى تاقىرىبى.
ونىڭ ازاماتتىق ليريكاعا تۇنعان, رەسپۋبليكامىزدىڭ كەڭ بايتاق جەرىن جىرعا قوساتىن «اق ەركە - اق جايىق», «ارىس جاعاسىندا», «سىر سۇلۋى», «تەرىسكەي», «قارقارالى», ء«ومىر وزەن», ت.ب. تۋىندىلارىن جۇرتشىلىق ەرەكشە ىقىلاسپەن قابىلدادى. كومپوزيتوردىڭ مارش ەكپىندى, جىگەرلى, شاتتىقپەن شىرقالاتىن «مەنىڭ قازاقستانىم», «باقىت قۇشاعىندا», «بارىنەن دە سەن سۇلۋ» سياقتى اندەرى حالىق اراسىنا كەڭىنەن تارادى.
سازگەر 1992 جىلى 29 اقپاندا 62 جاسقا قاراعان شاعىندا ۇزاققا سوزىلعان اۋىر سىرقاتتان كوز جۇمعان بولاتىن.
ءشامشىنىڭ جۇرەك تەربەگەن سىرلى اندەرى ۇلت رۋحىن وياتىپ, بىرنەشە بۋىننىڭ جادىندا جاتتالىپ, حالقىمىزدىڭ مادەني قازىناسىنا اينالدى.