قارجى مونيتورينگى اگەنتتىگىنىڭ ءباسپاسوز قىزمەتى حابارلاعانداي, ەلوردادا ەلەكتروندى تەمەكى (ۆەيپ), اروماتيزاتورلار مەن سۇيىقتىقتاردىڭ زاڭسىز اينالىمىنا توسقاۋىل قويىلدى. تاۋار Telegram مەسسەندجەرى جانە كۋرەرلىك جەتكىزۋ ارقىلى ەلىمىزدىڭ بارلىق وڭىرىنە تاراتىلىپ كەلگەن, دەپ جازادى Egemen.kz.
اگەنتتىكتىڭ مالىمەتىنشە, استانالىق دەپارتامەنت قىزمەتكەرلەرى جۇرگىزگەن جەدەل ءىس-شارا بارىسىندا كونترافاكتىلىك ءونىم ساقتالعان بەس قويما انىقتالدى.
ءتىنتۋ كەزىندە 490 مىڭنان استام ۆەيپ تاركىلەنگەن. ولاردىڭ ساتىلىمىنان تۇسەر زاڭسىز تابىس كولەمى 6 ملرد تەڭگەدەن اسۋى مۇمكىن ەكەنى بولجانىپ وتىر.
سونىمەن قاتار, كۇدىكتىلەر زاڭسىز تابىستى جاسىرۋ ءۇشىن «دروپەرلەر», ياعني بانكتىك كارتالارى ءىرى سومالاردى قولما-قول الۋعا راسىمدەلگەن جالعان تۇلعالاردى پايدالانىپ, اقشانى اينالىمنان شىعارۋ جانە ونىڭ شىعۋ تەگىن جاسىرۋ تەتىگىن ۇيىمداستىرعانى بەلگىلى بولدى.
تەرگەۋ بولجامىنا سايكەس, ۇيىمداستىرۋشى زاڭسىز تابىستىڭ ءبىر بولىگىن شەتەلدەن كوفە جەتكىزۋگە ارنالعان كەلىسىمشارتتار جاساۋعا جۇمساپ, وعان 92 ملن تەڭگەدەن استام قارجى باعىتتاعان.
سوت شەشىمىمەن تىيىم سالىنعان ونىمدەردى تاسىمالداۋعا پايدالانىلعان كولىككە ارەست قويىلدى.
ۇيىمداستىرۋشىلار ىزدەۋگە جاريالانىپ, بۇلتارتپاۋ شاراسى رەتىندە قاماۋعا الۋ تاعايىندالدى.
قما حابارلاۋىنشا, تەرگەۋ ءالى دە جالعاسىپ جاتىر. قىلمىستىق-پروتسەستىك كودەكستىڭ 201-بابىنا سايكەس, وزگە مالىمەتتەر جاريا ەتۋگە جاتپايدى.