تۋريزم جانە سپورت ءمينيسترى ەربول مىرزابوسىنوۆ تاەكۆوندودان XXXII جازعى ۋنيۆەرسيادا مەن جاسوسپىرىمدەر اراسىنداعى ازيا چەمپيوناتىنىڭ جۇلدەگەرلەرىمەن كەزدەستى. ءىس-شاراعا حالىقارالىق تاەكۆوندو فەدەراتسياسىنىڭ (WT) پرەزيدەنتى چۋنگۆون چوۋ, قازاقستان تاەكۆوندو فەدەراتسياسىنىڭ پرەزيدەنتى قۇدىرەت شاميەۆ, جاتتىقتىرۋشىلار جانە جاس سپورتشىلار قاتىستى, دەپ حابارلايدى Egemen.kz.
ەسكە سالايىق, گەرمانيادا وتكەن XXXII جازعى ۋنيۆەرسيادادا ساميرحون اباباكيروۆ التىن مەدال جەڭىپ السا, مالايزيادا وتكەن جاسوسپىرىمدەر اراسىنداعى ازيا چەمپيوناتىندا ايىم سەرىكباەۆا, بۋنەد باحرامقۇلوۆ, ارۋجان نايمانباەۆا توپ جاردى. سارى قۇرلىق دوداسىندا ەرەكشە كوزگە تۇسكەن ايىم سەرىكباەۆا ءتۋرنيردىڭ ۇزدىك سپورتشىسى اتانسا, جەكە باپكەرى ەركەبۇلان ەرمەكاليەۆ سپورتشىنى دايىنداعانى ءۇشىن العىس حاتپەن ماراپاتتالعان ەدى.
جيىن بارىسىندا دوكتور چوۋعا تاەكۆوندونى جاھاندىق دەڭگەيدە دامىتۋعا قوسقان ۇلەسى ءۇشىن العىسىن بىلدىرگەن ە.مىرزابوسىنوۆ سونداي-اق ۇلتتىق قۇرامانىڭ باس باپكەرى ەسبول سۇلتانوۆقا وتاندىق تاەكۆوندونى دامىتۋعا قوسقان ەلەۋلى ۇلەسى جانە كوماندامەن تابىستى جۇمىسى ءۇشىن العىس ايتتى. سونىمەن قوسا, مينيستر جۇلدەگەرلەردى قۇتتىقتادى.
«بۇگىندە مەملەكەت سىزدەردىڭ جوعارى جەتىستىككە جەتىپ, شەبەرلىكتەرىڭىزدى شىڭداۋعا بارلىق جاعداي جاساپ وتىر, ارقايسىڭىزبەن جەكە جۇمىس ىستەيتىن جاتتىقتىرۋشىڭىز بار. بۇگىنگى جەتىستىكتەر – كوپ جىلدىق ەڭبەكتىڭ, جۇيەلى دايىندىقتىڭ جانە ءوز ىسىنە ادالدىقتىڭ ناتيجەسى. سىزدەر الەمدىك ارەنادا ەل نامىسىن ابىرويمەن قورعاپ, ەلىمىزدى بۇكىل الەمگە تانىتىپ جۇرسىزدەر», دەدى مينيستر.
سپورتشىلارعا قۇرمەت گراموتالارى, العىس حاتتار جانە فەدەراتسيا اتىنان سەرتيفيكاتتار تابىستالدى.
ايتا كەتەلىك, 14-16 تامىز كۇندەرى ەلورداداعى جاقسىلىق ۇشكەمپىروۆ اتىنداعى جەكپە-جەك سارايىندا تاەكۆوندودان Kazakhstan Open 2025 حالىقارالىق رەيتينگتىك ءتۋرنيرى وتەدى. دوداعا الەمنىڭ 22 ەلىنەن 750-دەن استام سپورتشى قاتىسادى دەپ كۇتىلىپ وتىر. ولاردىڭ قاتارىندا وليمپيادا چەمپيوندارى, الەم چەمپيوناتتارىنىڭ جۇلدەگەرلەرى جانە الەمدىك رەيتينگتىڭ كوشباسشىلارى بار. جارىس كادەتتەر, جاسوسپىرىمدەر جانە ەرەسەكتەر اراسىندا وتەدى.