ساۋدا جانە ينتەگراتسيا ءمينيسترى ارمان شاققاليەۆ باستاعان دەلەگاتسيا «EXPO-2025 Osaka» دۇنيەجۇزىلىك كورمەسىندە قازاقستاننىڭ ۇلتتىق كۇنى اياسىنداعى ءىس-شارالارعا قاتىسۋ ءۇشىن جاپونياعا رەسمي ساپارمەن باردى.
«EXPO National Day Hall» (EXPO ۇلتتىق كۇنى زالى) الاڭىندا مينيستر ا.شاققاليەۆ پەن Osaka EXPO-2025 قاۋىمداستىعى وكىلدەرىنىڭ قاتىسۋىمەن قازاقستان رەسپۋبليكاسىنىڭ تۋىن كوتەرۋ ءراسىمى وتكىزىلدى.
«بۇگىنگى ءىس-شارا قازاقتىڭ ۇلى ويشىلى اباي قۇنانباي ۇلىنىڭ 180 جىلدىعىنا ورايلاستىرىلعان. بۇل وڭىرلەردىڭ گەوگرافيالىق قاشىقتىعىنا قاراماستان, رۋحىمىزدىڭ جاقىن ەكەنىن بىلدىرەدى, سەبەبى ءبىزدى داستۇرلەر مەن اعا بۋىنعا دەگەن قۇرمەت, ءبىلىم مەن ەڭبەككە دەگەن جوعارى ءمان بىرىكتىرەدى», دەدى ا.شاققاليەۆ ءىس-شارانىڭ رەسمي اشىلۋ سالتاناتىندا.
ءوز كەزەگىندە جاپونيانىڭ ەكونوميكا, ساۋدا جانە ونەركاسىپ ۆيتسە-ءمينيسترى اكيوسي كاتو وساكاداعى EXPO-دا وتكەن ەلىمىزدىڭ ۇلتتىق كۇنىمەن قازاقستاندىق دەلەگاتسيانى قۇتتىقتاپ, مادەني الماسۋدىڭ ءوزارا تۇسىنىستىكتى, ىنتىماقتاستىقتى جانە ەكى ەل اراسىنداعى بايلانىستاردى دامىتۋداعى ماڭىزدىلىعىنا توقتالدى.
دۇنيەجۇزىلىك كورمە قوناقتارى ءۇشىن قازاقستاننىڭ ۇلتتىق كۇنىن مەرەكەلەۋ شەڭبەرىندە EXPO اۋماعىندا بالۋانىمىز ءتورت دۇركىن الەم رەكوردشىسى سەرگەي تسىرۋلنيكوۆتىڭ, ۇلتتىق كيىمدەگى ارتىستەر مەن باتىرلاردىڭ قاتىسۋىمەن اۋقىمدى شەرۋ ۇيىمداستىرىلدى. «Expo Hall Shining Hat» ساحناسىندا قازاق ونەرپازدارىنىڭ قاتىسۋىمەن كونتسەرت قويىلدى. اۋقىمدى مەرەكەلىك باعدارلاماعا شامامەن 3 مىڭ كورەرمەن جينادى. ەل مادەنيەتىنىڭ بايلىعىن پاش ەتكەن دينا نۇرپەيىسوۆا اتىنداعى اكادەميالىق حالىق اسپاپتارى وركەسترىنىڭ اۋەندەرىمەن, Sarmad جانە Art Dombyra انسامبلدەرىنىڭ ەتنو جانە فولكلورلىق ىرعاقتارىمەن, وپەرا سوليستەرى زارينا التىنباەۆا مەن التىنبەك ءابىلدانىڭ كەرەمەت داۋىسى, سونداي-اق «بىرلىك» ءانسامبلىنىڭ جىگەرلى بي قويىلىمدارى جانە قازاقستاننىڭ كوپتەگەن باسقا دا تالانتتى ارتىستەرىنىڭ ونەرىمەن ەستە قالدى. كەشتە قۇرمانعازىنىڭ, ن.تىلەنديەۆتىڭ, ق.احمەدياروۆتىڭ, ل.ءحاميديدىڭ, ە.برۋسيلوۆسكيدىڭ جانە حالىق سۇيىسپەنشىلىگىنە بولەنگەن وزگە دە كومپوزيتورلاردىڭ تۋىندىلارى كورەرمەننىڭ ىستىق ىقىلاسىنا بولەندى.
قازاقستان پاۆيلونى كەلۋشىلەر اراسىندا وتە تانىمال ەكەنىن ايتا كەتكەن ءجون. وعان كەلگەن قوناقتار سانى 900 مىڭعا جەتتى.
قاپەرلەي كەتسەك, بيىل جاپونيانىڭ وساكا قالاسىندا EXPO-2025 دۇنيەجۇزىلىك كورمەسى باستالدى. ۇيىمداستىرۋشىلاردىڭ دەرەگى بويىنشا اۋقىمدى ءىس-شاراعا 160 ەل مەن 9 حالىقارالىق ۇيىم, 28 ملن-نان اسا ادام قاتىسادى دەگەن بولجام بار.