اۋىلداعى ءومىر ساپاسىن ارتتىرىپ, الەۋمەتتىك ينفراقۇرىلىمدى دامىتۋدىڭ ماڭىزدى تەتىگى ىسپەتتى گازداندىرۋ جۇمىستارى وڭىرلەردە بەلسەندى جۇزەگە اسىرىلىپ جاتىر, دەپ جازادى Egemen.kz.
الماتى وبلىسى اۋماعىنداعى شارىن اۋىلىندا ۇزىندىعى 64 كم بولاتىن گاز قۇبىرىنىڭ قۇرىلىسى اياقتالىپ, 1 200-دەن استام ۇيگە, مەكتەپكە, اۋرۋحاناعا, بالاباقشاعا جانە اكىمشىلىك عيماراتتارعا گاز قوسىلدى. تاشقاراسۋ جانە باحارق اۋىلدارىندا قۇرىلىس جۇمىستارى بەلسەندى جۇرگىزىلىپ جاتىر. جۋىردا تاعى 978 ءۇي مەن الەۋمەتتىك نىساندار گازعا قوسىلماق.
جوبا مەملەكەت باسشىسىنىڭ تاپسىرمالارى جانە قازاقستاندى 2030 جىلعا دەيىن گازداندىرۋدىڭ باس سىزباسى شەڭبەرىندە «QazaqGaz» ۇلتتىق كومپانياسىمەن جۇزەگە اسىرىلىپ جاتىر. بۇگىندە الماتى وبلىسى حالقىنىڭ 77%-ى تابيعي گازعا قول جەتكىزىپ وتىر. وبلىستا 373 ەلدى مەكەننىڭ 157-ءسى, سونىڭ ىشىندە 5 قالا تولىق گازداندىرىلعان. گاز جەلىلەرىنىڭ جالپى ۇزىندىعى 4 200 كم-دەن اسادى, ال جىلدىق تۇتىنۋ كولەمى – 200 ملن تەكشە مەتر.
ەنەرگەتيكا مينيسترلىگىنىڭ مالىمەتىنشە جالپى, قازاقستان بويىنشا گازداندىرۋ دەڭگەيى 62,4%-دى قۇراپ وتىر. بۇل دەگەنىمىز – 20,2 ملن حالىقتىڭ 12,6 ميلليونى تابيعي گازعا قول جەتكىزگەن. بۇل كورسەتكىش 2023 جىلمەن سالىستىرعاندا 2,4%-عا جوعارى. 2024 جىلى 4 000 كم-دەن استام گاز قۇبىرى سالىنىپ, 93 جوبا ىسكە اسىرىلعان. بيىل تاعى 77 جوبانى اياقتاپ, 300 مىڭنان استام ادامدى گازبەن قامتاماسىز ەتۋ جوسپارعا الىنعان.