مەملەكەتتىك ەڭبەك ينسپەكتورلارى بيىلعى 1 تامىزداعى جاعداي بويىنشا رەسپۋبليكانىڭ 239 كاسىپورنى 3,5 مىڭنان استام جۇمىسكەرگە 1,3 ملرد تەڭگەگە جالاقى بويىنشا بەرەشەك ەكەنىن جانە ءتۇرلى ۇيىمداردا جۇرگىزىلگەن تەكسەرۋلەر بارىسىندا ەڭبەك قۇقىعى بۇزىلۋىنىڭ 4 مىڭنان استام فاكتىسىن انىقتاعان, دەپ جازادى Egemen.kz.
جالاقى بويىنشا بەرەشەگى جانە ەڭبەك قۇقىعىنىڭ بۇزىلۋى انىقتالعان كاسىپورىنداردىڭ باسشىلارىنا ورىنداۋعا مىندەتتى 2 287 ۇيعارىم بەرىلدى جانە 277 ملن تەڭگەدەن استام سوماعا ايىپپۇل سالىندى.
جالاقى بويىنشا بەرەشەكتى وتەۋدىڭ قاتاڭ كەستەلەرى مەن مەرزىمدەرىن بەلگىلەۋدىڭ ناتيجەسىندە 3,4 مىڭنان استام جۇمىسكەردىڭ قۇقىقتارى قورعالىپ, ولارعا 1,1 ملرد تەڭگە تولەنگەن.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە 1 تامىزداعى دەرەكتەر بويىنشا مەملەكەتتىك ەڭبەك ينسپەكتورلارى 3 514 تەكسەرۋ جۇرگىزۋ بارىسىندا 4 132 بۇزۋشىلىق انىقتالعان, ونىڭ ىشىندە: ەڭبەك سالاسىندا – 3 465; ەڭبەك قاۋىپسىزدىگى جانە ەڭبەكتى قورعاۋ بويىنشا – 648; حالىقتى جۇمىسپەن قامتۋ بويىنشا – 19.
قابىلدانعان شارالاردىڭ ناتيجەسىندە 25 مىڭ جۇمىسكەردىڭ ەڭبەك قۇقىعى قورعالعان.