تاڭەرتەڭنەن باستاپ اقتوبەدە ۇلى ويشىل, اقىن جانە اعارتۋشى اباي قۇنانباي ۇلىنىڭ ەسىمىمەن اتالعان بۋلۆاردا «اباي كۇنى» ادەبي فەستيۆالى ءوتتى.
مەرەكەلىك ءىس-شارا اباي ەسكەرتكىشىنە گۇل شوقتارىن قويۋدىڭ سالتاناتتى راسىمىنەن باستالدى. ويشىلدىڭ رۋحىنا تاعزىم ەتۋگە وبلىس اكىمى اسحات شاحاروۆ, قالا اكىمى ازامات بەكەت, قوعام وكىلدەرى, عالىمدار, جازۋشىلار, مادەنيەت قايراتكەرلەرى, ستۋدەنتتەر جانە قالا تۇرعىندارى كەلدى.
«اباي – قازاق حالقىنىڭ عانا ەمەس, بۇكىل ادامزاتتىڭ رۋحاني قازىناسى. ونىڭ فيلوسوفياسى, ولەڭدەرى مەن پروزاسى ءبىزدى ادال, ءادىل بولۋعا, بىلىمگە ۇمتىلۋعا جانە بىرلىكتە ءومىر سۇرۋگە ۇيرەتەدى. بۇگىن ۇلى ويشىلدىڭ 180 جىلدىعىن اتاپ ءوتىپ, ءبىز ونىڭ ولمەس يدەيالارىنا قۇرمەت كورسەتەمىز. اقتوبە وبلىسىندا ءبىز اباي شىعارماشىلىعىن ناسيحاتتاۋدى جانە ونىڭ جاستارعا اماناتتاعان قۇندىلىقتارىن دارىپتەۋدى جالعاستىرامىز. ونىڭ مۇراسى ءبىزدى الداعى ۋاقىتتا دا جاسامپازدىققا جانە اۋىزبىرشىلىككە جەتەلەي بەرسىن»,-دەپ قۇتتىقتاۋ ءسوزىن ارنادى وبلىس اكىمى.
اسحات شاحاروۆتىڭ قۇتتىقتاۋ سوزىنەن كەيىن كورەرمەندەر ۇلى ويشىلدىڭ ءومىرى مەن شىعارماشىلىعىنا قىزىقتى ساياحات جاسادى. العاش بولىپ ساحنادا «ابايدىڭ دۇنيەگە كەلۋى» اتتى اسەرلى مونولوگ-قويىلىم قويىلدى. ودان كەيىن «الاقاي» قۋىرشاق تەاترى «ابايدىڭ بالالىق شاعى» سپەكتاكلىن كورەرمەن نازارىنا ۇسىندى, ال مۋزىكالىق ۇزىلىستەردە اقىننىڭ سۇيىكتى شىعارمالارى – «سەگىز اياق» جانە «جەلسىز تۇندە جارىق اي» ورىندالدى.
ت. احتانوۆ اتىنداعى وبلىستىق دراما تەاترى اكتەرلەرىنىڭ فيلوسوفيالىق بەينەنى, ابايدىڭ ويلارى مەن ونەگەلىك ۇستانىمدارىن تىرىلتكەن تەاترلاندىرىلعان كورىنىستەرى ەرەكشە قىزىعۋشىلىق تۋدىردى.