قۇرىلىس سالاسىنىڭ بۇگىنگى كەلبەتى مەن ەڭبەك ادامىنىڭ ءۇنى

ستاتيستيكاعا سۇيەنسەك, 2025 جىلدىڭ العاشقى جارتىجىلدىعىنىڭ وزىندە قازاقستاندا 7,9 ملن شارشى مەتر تۇرعىن ءۇي پايدالانۋعا بەرىلدى. ونىڭ ىشىندە 2,7 ملن شارشى مەتر – جەكە تۇرعىن ۇيلەر بولسا, 5,2 ملن شارشى مەتر – كوپ پاتەرلى تۇرعىن ۇيلەرگە تيەسىلى. بۇل – قۇرىلىسشىلاردىڭ تىنىمسىز ەڭبەگىنىڭ ناقتى ناتيجەسى.

سوڭعى التى جىلدا (2019–2024 جج.) پايدالانۋعا بەرىلگەن تۇرعىن ءۇي كولەمى 97,9 ملن شارشى مەتردى قۇرادى. بۇل كورسەتكىشتىڭ 40%-ى جەكە قۇرىلىس, ال قالعانى كوپ قاباتتى تۇرعىن ۇيلەر. مەملەكەتتىك باعدارلامالاردىڭ دا ۇلەسى از ەمەس. تەك 2025 جىلدىڭ ءبىرىنشى جارتىجىلدىعىندا عانا 7 156 قازاقستاندىق وتباسى باسپانالى بولىپ, قونىس تويىن اتاپ ءوتتى. ولاردىڭ قاتارىندا كوپبالالى وتباسىلار, مۇگەدەك جاندار, جەتىم بالالار بار.

ءبىزدىڭ بۇگىنگى كەيىپكەرىمىز دۋلات تولەن ۇلى قۇرىلىس سالاسىنا ستۋدەنت كەزىندە كەلگەن.

«قۇرىلىس سالاسىندا 2009 جىلدان باستاپ جۇمىس ىستەيمىن. ستۋدەنت بولىپ جۇرگەن كەزدە, جازعى دەمالىستا قوسىمشا اقشا تابايىن دەپ قۇرىلىسقا كەلگەنمىن. سول ساتتەن باستاپ قۇرىلىستا جۇرگەنىمە 16 جىل بولىپتى», دەپ باستادى اڭگىمەسىن بەيسەنباەۆ دۋلات توكەن ۇلى.

ارماتۋرا سالاسىن يگەرگەن دۋلات جوعارى وقۋ ورنىندا مۇلدەم باسقا ماماندىق بويىنشا ءبىلىم العان. الايدا, قازىرگى تاڭدا قۇرىلىس سالاسىنداعى ەڭبەگىنىڭ جەمىسىن كورىپ وتىر. ول ەلىمىزدەگە ەڭ ءىرى نىسانداردىڭ قۇرىلىسىنا, سونىڭ ىشىندە - الەمدىك دەڭگەيدە بوي كوتەرگەن «الماتى ارەنا» نىسانىنىڭ قۇرىلىسىنا تولىق قاتىسقان. ال, بۇگىنگى كۇنى الماتى قالاسىنداعى قالقامان مەترو ستانتسياسىنىڭ قۇرىلىسىندا ەڭبەك ەتىپ ءجۇر.

قۇرىلىس – ءبىزدىڭ وتباسىلىق كاسىبىمىز

ەڭ قىزىعى, بۇل سالادا جالعىز دۋلات ەمەس ونىڭ اعاسى داۋلەت بەيسەنباەۆ تا جۇمىس ىستەيدى, ياعني, بۇنى وتباسىلىق كاسىپ دەسەك تە ارتىق ەتپەس.

«مەن  تەمىر-بەتون قۇرىلىمدارىنىڭ ارماتۋرالارىن پىشىنگە كەلتىرۋ جانە ولاردى ءتيىستى جەرىنە ورناتامىن. قاراماعىمىزدا 12-15 قۇرىلىسشى بار. قۇرىلىس ءبىز ءۇشىن وتباسىلىق ەڭبەك كوزى. مەنىڭ اعام - بەيسەمباەۆ داۋلەت تولەن ۇلى دا وسى قۇرىلىس سالاسىندا ءجۇر. قۇرىلىس – تەك قارا جۇمىس ەمەس. ءبىز جوبامەن جۇمىس ىستەيمىز. قۇجات قاراپ, ناقتى ولشەممەن, سىزبامەن جۇمىس جاساۋ – ۇلكەن جاۋاپكەرشىلىكتى تالاپ ەتەدى», دەيدى ول.

ونىڭ ايتۋىنشا, بۇل سالا ءبىلىم مەن توزىمدىلىكتى قاجەت ەتەدى. ەڭ باستى نازاردا – ۇيلەردىڭ ساپالى قۇرىلىسى.

«زامان تالابىنا ساي قۇرال-سايماندار دا دامىپ كەلەدى. قازىرگى ءسات - تەحنولوگيانىڭ ءبىر ورىندا تۇرماي, دامىپ جاتقان زامانى عوي. ال ارماتۋرا مەن مونوليت بەتون وزگەرىسسىز جۇرەدى, سەبەبى, سەيسميكالىق جاعىنان جەر سىلكىنىسنە توتەپ بەرەدى», دەيدى دۋلات تولەن ۇلى.

قۇرىلىسشىلار – ەل دامۋىنىڭ نەگىزى

قۇرىلىسشى – كۇننىڭ اپتاپ ىستىعىنا دا, قىستىڭ قاقاعان ايازىنا دا قاراماي ەڭبەك ەتەتىن, قوعام تىرشىلىگىنىڭ ناعىز تىرەگىنە اينالعان مامان. ولاردىڭ جۇمىسى — سىرت كوزگە قاراپايىم كورىنگەنىمەن, شىن مانىندە, ءاربىر قابىرعادا, ءاربىر ىرگەتاستا سولاردىڭ ماڭداي تەرى مەن تابان اقىسى جاتىر.

بۇگىنگى تاڭدا ەل ىشىندەگى جاڭا ۇيلەر, مەكتەپتەر, اۋرۋحانالار مەن جولدار – ءبارى دە قۇرىلىسشىلاردىڭ تىنىمسىز ەڭبەگىنىڭ جەمىسى. ولار تاڭمەن تالاسا تۇرىپ, كەش باتقانشا بەتون ارالاستىرىپ, تەمىر بايلاپ, قالىپ قۇرىپ جۇرەدى. قوعام دامۋىنىڭ نەگىزى سانالاتىن ينفراقۇرىلىم سولاردىڭ قولىمەن بوي كوتەرەدى.

قۇرىلىسشىنىڭ ەڭبەگى – بۇل جاي عانا جۇمىس ەمەس, ۇرپاققا ميراس بولاتىن تۇراقتىلىقتىڭ, قاۋىپسىزدىكتىڭ, جانە جايلى ءومىردىڭ نەگىزى. سوندىقتان بۇل ماماندىق يەلەرىنە دەگەن قۇرمەت ارقاشان جوعارى بولۋعا ءتيىس.