عىلىم جولىندا ىزدەنىپ, جوعارى ءبىلىم العىسى كەلەتىن جاستار ءۇشىن قازىر شەتەلدىك ۋنيۆەرسيتەتتەردىڭ فيليالدارىندا ءبىلىم الۋ مۇمكىندىكتەرى كەڭەيىپ كەلەدى. وسىنداي باستامالاردىڭ ءبىرى رەتىندە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى بازاسىندا ماسكەۋ مەملەكەتتىك حالىقارالىق قاتىناستار ينستيتۋتىنىڭ (ممحقي) قابىلداۋ كوميسسياسى ءوز جۇمىسىن باستادى.
وقىتۋ اتالعان ينستيتۋتتىڭ جوعارى اكادەميالىق ستاندارتتارىنا سايكەس جۇرگىزىلەدى. ساباقتى شەتەلدەن كەلگەن وقىتۋشىلارمەن قاتار, ينستيتۋت ادىستەمەسى بويىنشا ارنايى دايىندىقتان وتكەن ەلىمىزدىڭ بىلىكتى ماماندارى وتكىزەدى.
ماگيستراتۋرا دەڭگەيىندە فيليال «قارجىلىق ەكونوميكا جانە قارجىلىق تەحنولوگيالار», سونداي-اق «كوپجاقتى ينستيتۋتتار جانە جاھاندىق تەحنولوگيالىق دامۋدى باسقارۋ» ءبىلىم بەرۋ باعدارلامالارىن ۇسىنادى. وقۋ مەرزىمى – ەكى جىل. جالپى سانى 40 گرانتتىق ورىن قاراستىرىلعان. ءار باعدارلاما بويىنشا 20 ورىن. سونىمەن قاتار اقىلى نەگىزدە وقۋ مۇمكىندىگى دە بار. ايتا كەتەيىك, ماگيستراتۋراعا قۇجاتتاردى قابىلداۋ تامىز ايىنىڭ سوڭىنا دەيىن جالعاسادى.
وقۋ باعدارلاماسى حالىقارالىق ءبىلىم بەرۋ مودۋلدەرىن قامتيدى. ناقتىراق ايتساق, باكالاۆريات ستۋدەنتتەرى ماسكەۋ مەملەكەتتىك حالىقارالىق قاتىناستار ينستيتۋتىنىڭ رەسەيدەگى كامپۋستارىندا ەكى سەمەستر ءبىلىم الادى, ال ماگيسترانتتار – ەكى ايلىق وقۋ مودۋلىنەن وتەدى. وقۋ اياقتالعان سوڭ تۇلەكتەرگە رەسەي فەدەراتسياسىنىڭ مەملەكەتتىك ۇلگىدەگى, ممحقي ديپلومىمەن تەڭ دارەجەدە تانىلاتىن ديپلوم تابىستالادى.
باستاپقى كەزەڭدە اتالعان ينستيتۋتتىڭ ەلىمىزدەگى فيليالى ل.ن.گۋميلەۆ اتىنداعى ەۇۋ اۋماعىندا ورنالاسادى, كەيىنىرەك جەكە عيماراتقا كوشىرىلەدى.