ورال قالاسىندا اباي قۇنانباي ۇلىنىڭ 180 جىلدىعىنا ارنالعان «اباي مۇراسى – ۇلت رۋحانياتىنىڭ التىن دىڭگەگى» اتتى وبلىستىق عىلىمي-تانىمدىق كونفەرەنتسيا ءوتتى دەپ حابارلايدى Egemen.kz.
جۇبان مولداعاليەۆ اتىنداعى وبلىستىق امبەباپ عىلىمي كىتاپحانا ۇيىمداستىرعان كونفەرەنتسياعا فيلولوگيا, تاريح سالالارىنداعى عالىمدار مەن ءتۇرلى سالا ماماندارى اباي شىعارماشىلىعىنا قاتىستى وزەكتى ماسەلەلەردى تالقىلادى.
باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ, ۇلتتىق قۇرىلتاي مۇشەسى, جازۋشى باۋىرجان عۇبايدۋللين ءوز سوزدەرىندە ابايدىڭ رۋحاني مۇراسى جالپى ادامزاتقا ورتاق, ال قازاق بالاسى ءۇشىن ەڭ باستى باعدار دەگەن ويدى ايتىپ ءوتتى.
ماحامبەت ۋنيۆەرسيتەتىنىڭ پروفەسسورى, پەداگوگيكا عىلىمدارىنىڭ دوكتورى ابات قىدىرشاەۆ «اباي مۇراسى – ۇلتتىق قۇندىلىقتار ايناسى» اتتى بايانداماسىندا ابايدىڭ قارا سوزدەرىندەگى پالساپالىق مازمۇنعا توقتالسا, وسى وقۋ ورنىنىڭ تاعى ءبىر پروفەسسورى, فيلولوگيا عىلىمدارىنىڭ كانديداتى زەينوللا مۇتيەۆ اباي مەن فاريزا ولەڭدەرىندەگى ساباقتاستىق تۋرالى ايتىپ بەردى. ادەبيەتتانۋشى عالىم, فيلولوگيا عىلىمدارىنىڭ كانديداتى ريتا سۇلتانعاليەۆا دا اباي ويىنىڭ دانالىعى جايلى ءسوز قوزعادى. ماحامبەت ۋنيۆەرسيتەتىندە قازاقستان تاريحى كافەدراسىنىڭ مەڭگەرۋشىسى, تاريح عىلىمدارىنىڭ كانديداتى ءالفيا بايبولسىنوۆا اباي مۇراسى – ۇلتتىق يدەولوگيانىڭ نەگىزى ەكەنىن قاداپ ايتتى. ارداگەر ۇستاز, جۇبانتانۋشى ۇزىلدىك ەلەۋبايقىزىنىڭ «ادامزات وركەنيەتىنىڭ تولىق يەسى – اباي تاعىلىمى» اتتى بايانداماسى جاس ۇرپاققا باعىشتالدى. ال وسى شارانى ۇيىمداستىرعان جۇبان كىتاپحاناسىنىڭ ديرەكتورى شولپان ورازاەۆا بولسا باتىس قازاقستان وبلىسى كىتاپحانالارىندا اباي مۇرالارى قالاي ناسيحاتتالىپ جاتقانىنا توقتالدى.
كونفەرەنتسياداعى ۇزدىك باياندامالار جيناق رەتىندە جارىق كورەدى.
باتىس قازاقستان وبلىسى