2027 جىلدان باستاپ قازاقستاندا مىندەتتى الەۋمەتتىك مەديتسينالىق ساقتاندىرۋعا مەملەكەت تاراپىنان تۇسەتىن جارنالاردىڭ مولشەرى بىرتىندەپ ارتادى. بۇل تۋرالى دەنساۋلىق ساقتاۋ مينيسترلىگى ءمامس جۇيەسىن جەتىلدىرۋ جانە تالداۋ دەپارتامەنتىنىڭ ديرەكتورى ءلاززات شومانوۆا ورتالىق كوممۋنيكاتسيالار قىزمەتىندە وتكەن بريفينگتە مالىمدەدى, دەپ جازادى Egemen.kz.
ونىڭ ايتۋىنشا, بۇل جۇمىسشىلار مەن جۇمىس بەرۋشىلەردىڭ تولەيتىن جارنا كولەمىن ۇلعايتپاي, مەديتسينالىق كومەك جۇيەسىنىڭ ۇزاق مەرزىمدى تۇراقتىلىعىن قامتاماسىز ەتەدى.مەملەكەتتىڭ قارجىلاندىرۋ ۇلەسىنىڭ كەزەڭ-كەزەڭىمەن ءوسۋىنىڭ ناتيجەسىندە, جارنا مولشەرى بيىلعى 2%-دان 2037 جىلعا قاراي 4,7%-عا دەيىن ارتادى دەپ بولجانىپ وتىر. بۇل جۇيەگە قوسىمشا 2,8 تريلليون تەڭگە قارجى تارتۋعا مۇمكىندىك بەرمەك. ال ول ءوز كەزەگىندە حالىققا مەديتسينالىق كومەكتىڭ قولجەتىمدىلىگىن ارتتىرۋعا زور ۇلەس قوسادى.
سونداي-اق ەندى ءمامس جۇيەسىنە بەس جىل بويى تۇراقتى تولەم جاساعان ادامنىڭ ساقتاندىرىلعان مارتەبەسى 6 ايعا دەيىن ساقتالادى. ل.شومانوۆا بۇل نورما تۇراقتى تۇردە جۇيەگە قاتىسىپ كەلگەن, بىراق ۋاقىتشا قيىندىققا تاپ بولعان ازاماتتاردى قولداۋعا مۇمكىندىك بەرەتىنىن ايتتى.
سونىمەن بىرگە, زاڭناماعا اشىقتىقتى ارتتىرۋعا باعىتتالعان وزگەرىستەر ەنگىزىلگەن: - مەديتسينالىق ۇيىمدار مەن قوردىڭ قىزمەتى اشىق ءارى ەسەپ بەرۋگە مىندەتتى بولادى; - مەديتسينالىق جانە فارماتسەۆتيكالىق باقىلاۋ كوميتەتىنە قاداعالاۋ قۇزىرەتى بەرىلدى. ولار ارنايى قۇجاتسىز مەديتسينالىق قىزمەت كورسەتۋدى انىقتاسا, بىردەن توقتاتا الادى. بۇل وزگەرىستەر حالىقتىڭ مەديتسينالىق ساقتاندىرۋ جۇيەسىنە دەگەن سەنىمىن نىعايتۋعا جانە قاتىسۋ شارتتارىن ءادىل ەتۋگە باعىتتالعان.