قىزىلوردا. 7 مامىر. قالادا « ۇلى جەڭىس – ماڭگى ەل جادىندا» اتتى ۇلكەن ءىس-شارا ءوتتى. بۇل تۋرالى egemen.kz ءتىلشىسى حابارلادى.
اتى ايتىپ تۇرعانداي, بۇل 7 مامىر – وتان قورعاۋشىلار كۇنى جانە 9 مامىر – ۇلى جەڭىستىڭ 70 جىلدىعىنا ارنالعان مەرەكەلىك سالتانات ەدى.
بيىل جەڭىس تۋىنىڭ جەلبىرەگەنىنە 70 جىل تولىپ وتىر. وسى ءبىر سۇراپىل سوعىستا قانشاما بوزداق مايدان دالاسىندا قالدى. اتالعان شارا سوعىستان ورالماعان جاۋىنگەرلەرگە تاعزىم ەتىلىپ, وتان ءۇشىن وت كەشكەن ارداگەرلەردى ەسكە الىپ, ارامىزداعى كوزى ءتىرى مايدانگەرلەردى ۇلىقتاپ, جاس جەتكىنشەكتەرگە ەرلىكتى دارىپتەيتىن تاعىلىمدى سيپاتتا ءوتتى.
«بۇل دۇنيەدە ءبىزدىڭ جالعىز وتانىمىز بار. ول تاۋەلسىز قازاقستان. وتانىمىزدى قورعاۋ قاسيەتتى مىندەت, ۇلكەن مارتەبە»,– دەگەن ەدى ەلباسى. تاريحقا كوز جۇگىتسەك, ەل ءۇشىن جانىن اياماعان, كەۋدەسىن وققا توسقان باتىرعا كەندە ەمەسپىز. كەشەگى قان مايداندا ءبىزدىڭ اتالارىمىز ەلدى قورعاپ, جاۋدان ازات ەتىپ قالدى. جەڭىستىڭ جەتپىس جىلدىعىنا كۋا بولىپ وتىرعان قارتتارىمىز امان بولسىن. ال وتان قورعاۋشى بەيبىت كۇننىڭ ۇلاندارى تاۋەلسىزدىكتى تۇعىرلاندىرۋدا قىزمەت ەتەيىك», دەدى وبلىس اكىمى قىرىمبەك كوشەرباەۆ.
سونداي-اق, ايماق باسشىسى ۇلى وتان سوعىسى ارداگەرلەرىنە «قۇرمەت» وردەنى, «ەرەن ەڭبەگى ءۇشىن» مەدالىمەن, قر قۇرمەت گراموتاسى سەكىلدى مەملەكەتتىك ناگرادالاردى تابىستادى.
1418 كۇن, 34 ساعاتقا سوزىلعان قان مايداننىڭ قاسىرەتىن ۇمىتۋ مۇمكىن ەمەس. ەرلىكتىڭ ەرەن ۇلگىسىن كورسەتكەن باتىرلاردى دارىپتەۋ جالعاسا بەرەدى. وكىنىشتىسى, قارت مايدانگەرلەردىڭ قاتارى كۇن وتكەن سايىن سەرەپ بارادى. سوعىس دالاسىنان سىر وڭىرىنە 35 مىڭ جاۋىنگەر امان ورالسا, بۇگىندە سونىڭ 89-نىڭ عانا كوزى ءتىرى.
مەرەكەلىك شارادا وتان قورعاۋشىلارعا دا قۇرمەت كورسەتىلدى. ونەرپازدار ءتۇرلى قويىلىمدار قويىپ, اننەن شاشۋ شاشتى.
سونىمەن قاتار ورتالىق الاڭدا ساربازداردىڭ قويان-قولتىق ۇرىس كورىنىستەرىن كورسەتتى. مۇنان سوڭ وبلىس تۇرعىندارى لەد ەكران ارقىلى استاناداعى مەرەكەلىك شەرۋدى تاماشالادى.
ەرجان بايتىلەس.
دەرەك, سۋرەت: egemen.kz