ەلىمىزدە اۋىل شارۋاشىلىعى القاپتارىن شەگىرتكەگە قارسى حيميالىق وڭدەۋ جۇمىستارى اياقتالدى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە سالا مينيسترلىگىنە قاراستى اگرارلىق-ونەركاسىپتىك كەشەنىنىڭ (اوك) مەملەكەتتىك ينسپەكتسيا كوميتەتى توراعاسىنىڭ ورىنباسارى سايات ساقمولدين ءمالىم قىلدى, دەپ جازادى Egemen.kz.
«شەگىرتكەگە قارسى ۋاقىتىلى جانە ساپالى كۇرەس شارالارىن ۇيىمداستىرۋ – ەلدىڭ ازىق-ت ۇلىك قاۋىپسىزدىگىن قامتاماسىز ەتۋدەگى باسىم باعىتتاردىڭ ءبىرى. بيىل ءۇيىرلى شەگىرتكەلەرگە قارسى 2,7 ملن گەكتار اۋماقتا قورعاۋ شارالارى جۇرگىزىلدى. بۇل وتكەن جىلمەن سالىستىرعاندا 400 مىڭ گەكتارعا از. بۇگىندە بارلىق وڭىرلەردە وڭدەۋ تولىق اياقتالدى», دەدى سپيكەر.
مونيتورينگ تيىمدىلىگىن ارتتىرۋ ماقساتىندا زەرتتەۋلەرگە 4625 مامان جۇمىلدىرىلعان, بۇل 2024 جىلدان ەكى ەسە كوپ. سونداي-اق ازىرلەنگەن جول كارتاسى جۇزەگە اسىرىلدى.
جالپى 443 ارنايى تەحنيكا, سونىڭ ىشىندە 24 جەڭىل اۆياتسيا ۇشاعى, 31 اسا جەڭىل اۆياتسيا تەحنيكاسى, 49 اگرودرون پايدالانىلعان.
وڭدەۋ بارىسىندا قولدانىلعان بارلىق پرەپاراتتار جوعارى بيولوگيالىق تيىمدىلىككە يە ءارى قاۋىپسىزدىك تالاپتارىنا سايكەس بولعان.
رەسەي, وزبەكستان, قىرعىزستان جانە قىتايمەن بىرلەسكەن زەرتتەۋلەر, ونلاين-كەڭەستەر جانە شەگىرتكەنىڭ تارالۋى بويىنشا دەرەكتەر الماسۋ تۇراقتى تۇردە جۇرگىزىلىپ وتىردى.
شارا قورىتىندىسى بويىنشا اۋىل شارۋاشىلىعى داقىلدارىنىڭ زاقىمدانۋىنا, سونداي-اق شەگىرتكەنىڭ كورشى مەملەكەتتەردىڭ شەكارالاس اۋماقتارىنا كوشۋىنە جول بەرىلمەگەن.