14-20 شىلدە ارالىعىندا گەرمانيانىڭ بونن قالاسىندا ينفورماتيكادان ەۋروپالىق قىزدار وليمپياداسى (EGOI) ءوتتى. وۋشى قىزدار اراسىنداعى الگوريتمدىك باعدارلامالاۋدان الەمدەگى ەڭ ءىرى جارىسقا 60 ەلدەن 266 ءبىلىمپاز قاتىستى, دەپ جازادى Egemen.kz.
ال قازاقستان نامىسىن ۇلتتىق ىرىكتەۋدەن وتكەن:
استانا قالاسىنداعى نزم 11 سىنىپ وقۋشىسى تۇرعانباەۆا تاميلا; قوستاناي قالاسىنداعى فيزيكا-ماتەماتيكا ليتسەيىنىڭ 9 سىنىپ وقۋشىسى يگزەكوۆا الينا; استاناداعى Flagman جەكە مەكتەبىنىڭ 7-سىنىپ بايمۋحامبەتوۆا ارۋجان; الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 9 سىنىپ وقۋشىسى يساەۆا انيتا قورعادى.كوماندا ادينا ماگاۆينا مەن تەمىرلان ساتىلحانوۆ جەتەكشىلىك ەتكەن.
بيىلعى جىلى قازاقستان قۇراماسى وليمپيادانىڭ ۇيىمداستىرۋ كوميتەتىمەن رەسمي تۇردە بەكىتىلگەن استانادان قاشىقتاعى فورماتتا EGOI-گە قاتىستى. بارلىق راۋند حالىقارالىق جارىس ستاندارتتارىنا تولىق سايكەس, EGOI ۇيىمداستىرۋشىلارىنىڭ باقىلاۋىمەن ءوتتى.
العاش رەت قاتىسقان سايىتارى بولعانىنا قاراماستان تاميلا تۇرعانباەۆا مەن ارۋجان بايمۇحامبەتوۆا ەكى قولا مەدالگە قول جەتكىزدى.
«قىزدارىمىزدىڭ حالىقارالىق وليمپياداداعى جەڭىسى جاي عانا مەدال ەمەس. بۇل قازاقستاندا جوعارى تەحنولوگيالار سالاسىندا الەمدىك دەڭگەيدە باسەكەگە تۇسۋگە دايىن دارىندى وقۋشى قىزداردىڭ ءوسىپ كەلە جاتقانىنىڭ دالەلى. سپورتتىق باعدارلامالاۋ فەدەراتسياسى الداعى ۋاقىتتا دا ەلىمىزدىڭ تۇكپىر-تۇكپىرىندەگى بالالارعا مۇمكىندىكتەر جاساپ, جاڭا ۇرپاقتى IT-تەحنولوگيالار جولىنا تۇسۋگە شابىتتاندىرادى», دەدى قازاقستان سپورت باعدارلاماسىنىڭ پرەزيدەنتى باعدات مۋسين.
تاعى ءبىر ماڭىزدى ناتيجە قازاقستاننىڭ رەسمي تۇردە تانىلۋى بولدى. 2026 جىلدان باستاپ ەل EGOI-گە قاتىساتىن رەسمي ەلدەردىڭ تىزىمىنە ەنەتىن بولادى. بۇل وليمپيادانىڭ باس اسسامبلەياسىندا ءتورت جىل بويى قازاقستاننىڭ مۇددەسىن دايەكتى تۇردە قورعاعان كوماندا جەتەكشىلەرىنىڭ ۇزاق جىلعى ەڭبەگىنىڭ ناتيجەسى.
ايتا كەتەيىك, ينفورماتيكادان قىزداردىڭ ەۋروپالىق وليمپياداسى – ينفورماتيكانى وقۋدا قىزداردى قولداۋعا جانە IT سالاسىنداعى گەندەرلىك الشاقتىقتى جويۋعا باعىتتالعان جىل سايىن ۇيىمداستىرىلاتىن حالىقارالىق جارىس. قازاقستان EGOI-گە 2021 جىلدان بەرى قاتىسىپ كەلەدى جانە فەدەراتسيانىڭ جۇيەلى جۇمىسىنىڭ ارقاسىندا جاس باعدارلاماشىلاردىڭ تولقىنى قالىپتاسىپ كەلەدى.