وتكەن جىلدىڭ كوكتەمىندە شىمكەنت قالاسىنان مەرزىمدى اسكەري قىزمەتكە شاقىرىلعان 86 جىگىت بۇگىندە مەملەكەتتىك ءبىلىم گرانتىنىڭ يەگەرى اتانىپ, ەلىمىزدىڭ جوعارى وقۋ ورىندارىنا تۇسۋگە مۇمكىندىك الدى. بۇل – قورعانىس مينيسترلىگى مەن عىلىم جانە جوعارى ءبىلىم مينيسترلىگى بىرلەسىپ قولعا العان باستاما. اسكەري قىزمەت كەزىندە ءتارتىپ پەن جاۋاپكەرشىلىك تانىتقان ساربازداردى قولداۋعا باعىتتالعان.
سولاردىڭ ءبىرى – زاپاسقا شىققان قاتارداعى جاۋىنگەر جانبولات ەسپەن. ول اسكەرگە دەيىن شىمكەنت قالاسىنداعى جەرگىلىكتى اسكەري باسقارۋ ورگاندارىنىڭ بىرىندە ينسپەكتور بولىپ جۇمىس ىستەگەن. مەرزىمدى اسكەري قىزمەتتى ءساتتى وتەپ, جاعىمدى مىنەزدەمە العان ساربازدار ۇبت تاپسىرىپ, بالل جيناماي-اق ۋنيۆەرسيتەتكە تۇسە الادى. وسىنى ەستىگەن جانبولات مۇمكىندىكتى قالت جىبەرگىسى كەلمەيدى. ءسويتىپ, مەملەكەتتىك گرانت يەسى بولۋدى وزىنە ماقسات ەتىپ قويادى.
قاراعاندى گارنيزونىنداعى اسكەري بولىمدەردىڭ بىرىندە قىزمەت ەتكەن جانبولات وزىنە جۇكتەلگەن مىندەتتەردى ادال ورىنداپ, جاۋىنگەرلىك جانە مەملەكەتتىك-قۇقىقتىق دايىندىق باعدارلاماسىن جوعارى دەڭگەيدە مەڭگەردى. قىزمەت بارىسىندا بىرنەشە رەت استانا قالاسىنا ىسساپارعا بارىپ كەلدى. ونىڭ تاباندىلىعى مەن جاۋاپكەرشىلىگى ءبولىم باسشىلىعى تاراپىنان جوعارى باعالاندى. 12 ايلىق اسكەري قىزمەتىن ابىرويمەن اياقتاعاننان كەيىن «كوكتەم – 2024» شاقىرىلىمىنىڭ ۇزدىك ساربازدار قاتارىنا كىرگەن جانبولات ەسپەن مەملەكەتتىك گرانت يەگەرى اتاندى. بۇل قۋانىشتى جاڭالىقتى الدىمەن اناسى گۇلجاۋحار سارسەمباەۆا ەستيدى. ۇلىنىڭ بۇل جەتىستىگى انا جۇرەگىن ەرەكشە تولقىتقان. بالاسىن قۇتتىقتاپ, انالىق اق تىلەگىن ارنادى.
قازىر جانبولات تۋعان قالاسى شىمكەنتكە ورالىپ, «ميراس» ۋنيۆەرسيتەتىنە قۇجاتىن تاپسىرىپ, وقۋىن باستاۋعا دايىندالىپ ءجۇر. اسكەردەن زاپاسقا شىققان ول اباي, ءال-فارابي, تۇران اۋداندارى بويىنشا بىرىكتىرىلگەن قورعانىس ىستەرى باسقارماسىنا بارىپ, اسكەري قىزمەت ارقىلى مەملەكەتتىك گرانتقا قالاي قول جەتكىزۋگە بولاتىنىن ايتتى.
ء«ور رۋحتى بابالاردىڭ جولىن جالعاۋ – بۇگىنگى ۇرپاقتىڭ پارىزى. ەلىن, جەرىن جاۋدان قورعاۋ – ءاربىر ەر-ازاماتتىڭ مىندەتى. سول جاۋاپكەرشىلىكتى جەتە تۇسىنگەندىكتەن ءوز ەركىممەن اسكەر قاتارىنا الىنىپ, ابىرويمەن وتكەرىپ كەلدىم. تاۋەلسىزدىكتىڭ تىرەگى – ونىڭ اسكەري قورعانىسى. بۇگىندە مەملەكەت قورعانىس سالاسىن كۇشەيتۋگە بارىنشا كوڭىل ءبولىپ جاتىر. سونىڭ ىشىندە قاتارداعى جاۋىنگەرلەرگە دە ەرەكشە قامقورلىق پەن جاعداي جاسالعان. مۇنى ناعىز اسكەري ءومىردى كوزبەن كورىپ كەلگەن سارباز رەتىندە تولىق سەنىممەن ايتا الامىن. مەن اسكەردە جۇرگەندە جاۋىنگەرلىك تارتىپپەن بىرگە قارۋدان وق اتۋدى, اسكەري تەحنيكالار مەن ولاردىڭ پايدالانۋ ماقساتتارىن, سونداي-اق مايدان دالاسىندا ۇرىس جۇرگىزۋدىڭ ءادىس-تاسىلدەرىن ۇيرەندىم. ءوزىمدى, ەلىمدى جاۋدان قورعايتىن دايىن جاۋىنگەرمىن دەپ ەسەپتەيمىن. كەز كەلگەن ساتتە قولىما قارۋ الىپ, وتانىمدى جاۋدان قورعاۋعا ءازىرمىن. مەنىڭ ويىمشا, بارلىق ەر-ازامات وتانى ءۇشىن قۇربان بولۋعا دايىن بولۋى كەرەك. جوعارىدا ايتقانىمداي, اسكەردە ساربازدارعا بارلىق جاعداي جاسالعان. بورىشىمدى وتەۋ بارىسىندا ەشقانداي قيىندىق كورگەن جوقپىن. كەرىسىنشە, اسكەري ءومىر ماعان وتە قىزىقتى ءوتتى. سول جەردەن تالاي سىرلاس دوس تاپتىم. اسكەري قىزمەت مەنىڭ ءومىرىمنىڭ جاڭا ءبىر بەلەسى بولدى. جاۋىنگەرلىك مىندەتىمدى اتقارا ءجۇرىپ, وسى سالادا تالاي تاجىريبە جيناقتادىم. «قوياندى قامىس, جىگىتتى نامىس ولتىرەدى» دەمەكشى, اسكەرگە بارۋدان قورقۋدىڭ قاجەتى جوق. ساربازدىڭ اسكەردە قالاي جۇرەتىنى ءوزىن كوپشىلىك ورتادا قالاي ۇستايتىنىنا, مىنەزى مەن تاربيەسىنە بايلانىستى. ادال, وتىرىك سويلەمەيتىن, كىشىنى سىيلاپ, ۇلكەندى قۇرمەتتەي بىلەتىن, جاقسى مەن جاماندى اجىراتا الاتىن ادام قاي ورتادا جۇرسە دە, ءوز ابىرويىن جوعالتپايدى. ونىڭ ۇستىنە, قازىر جاۋىنگەرلىك مىندەتتىڭ مەرزىمى ءبىر-اق جىل. ءبىر جىل دەگەن ۋاقىت كوزدى اشىپ-جۇمعانشا وتەدى دە كەتەدى. ەر جىگىتتەردىڭ مىنەزىن قالىپتاستىراتىن, ناعىز ەرلەرشە شىڭدايتىن جەر – وسى اسكەري ورتا», دەدى كەزدەسۋدە اعىنان جارىلعان ج.ەسپەن.
اتالعان باسقارما باستىعىنىڭ ورىنباسارى, مايور ەرداۋلەت تەمىرباەۆ جانبولاتتىڭ جەتىستىگى اسكەردىڭ ەرلىك مەكتەبى عانا ەمەس, جارقىن بولاشاققا باستايتىن جول دەيدى.
ء«ار ادام ومىردە ءوز جولىن تاپقىسى كەلەدى. جاقسى مامان اتانۋ, سونىڭ جەمىسىن كورۋ – ومىردە سول جولىڭدى تاپقاندىقتىڭ بەلگىسى. سوندىقتان كەز كەلگەن جان بالا كەزىنەن ءوزىنىڭ ءسۇيىپ تاڭداعان ماماندىعىنىڭ يەسى بولعاندى ارماندايدى. سول سەبەپتى, كوپشىلىك ەر-ازاماتتار مەكتەپ بىتىرگەن سوڭ, تەزىرەك جوعارى وقۋ ورنىنا تۇسۋگە ۇمتىلادى. وقۋعا تۇسە الماي قالسا, ۋاقىتىن تەككە كەتىرگەندەي ەلەستەتەدى. ەر جىگىتتەردىڭ اسكەرگە بارۋعا اسىقپاۋىنىڭ ءبىر سەبەبى وسى بولسا كەرەك. مۇمكىندىگى باردا قولىنا ديپلوم الىپ ۇلگەرگەندى ءجون كورەدى. ويتكەنى ۋاقىت وتكەن سايىن ادام تىرشىلىكپەن الدانىپ, وقۋعا دەگەن باياعى قىزىعۋشىلىق پەن بەلسەندىلىگى ازايىپ قالۋى مۇمكىن. «تەمىردى قىزعان كەزدە سوق» دەمەكشى, مەكتەپ ءبىتىرىپ جالىنداپ تۇرعان شاقتا ءبىلىم جولىنىڭ ىرعاعىن بۇزباي, جوعارى وقۋ ورنىنا ءتۇسىپ كەتكەندى قالايدى. مىنە, قوعامنىڭ وسى ماسەلەسىن ەسكەرگەن مەملەكەت ساربازدار قاتارىنا الىنىپ, اسكەري بورىشىن وتەپ كەلگەن جاس جاۋىنگەرلەردىڭ ستۋدەنت اتانۋىنا ۇلكەن جەڭىلدىك جاساپ جاتىر. مەملەكەتتىڭ بۇل باستاماسى – ناعىز قامقورلىقتىڭ ۇلگىسى. كوپ جاعدايدا ساربازدار اسكەردەن ورالعان بويدا جۇمىسقا ارالاسىپ كەتەدى. جوعارى ءبىلىم الۋعا قۇلشىنىس ازايادى, وعان قوسا اقىلى نەگىزدە وقىتۋعا وتباسىلىق بيۋدجەتتىڭ جەتپەۋى مۇمكىن. بۇل رەتتە مەملەكەتتىڭ جاس جاۋىنگەرلەرگە ارنايى جەڭىلدىك جاساپ, تەگىن گرانت قاراستىرىپ بەرۋى – ۇلكەن الەۋمەتتىك قولداۋ», دەدى ە.تەمىرباەۆ.