جاڭا سالىق كودەكسى قابىلدانعاننان كەيىن ءىرى قۇرىلىس كومپانيالارىنىڭ بيزنەستى بىرنەشە بولىككە ءبولىپ, سالىق جۇكتەمەسىن ازايتۋ ارقىلى قوسىمشا تابىس تابۋى توقتاتىلادى. بۇل تۋرالى قر پرەمەر-ءمينيسترىنىڭ ءبىرىنشى ورىنباسارى رومان سكليار ۇكىمەت ۇيىندە وتكەن ءباسپاسوز ءماسليحاتىندا مالىمدەدى, دەپ جازادى Egemen.kz.
ونىڭ ايتۋىنشا, اتالعان زاڭ وزگەرىسى تۇرعىن ءۇي ساتىپ الۋشىلارعا تەرىس اسەر ەتپەيدى.
«بىزدە تۇرعىن ءۇي قۇنى نارىقتىق ادىستەرمەن رەتتەلەدى. الايدا, جەكە قۇرىلىسشىلاردان تۇرعىن ءۇي ساتىپ الاتىن تاپسىرىس بەرۋشى رەتىندە مەملەكەتتىڭ ارالاسۋى 10 جىل ىشىندە ءوزىنىڭ ءتيىستى اسەرىن بەرىپ كەلەدى. بىزدە تۇرعىن ءۇي باعاسى قاتتى قىمبات ەمەس. مەن «بيزنەس» نەمەسە «ەليتا» كلاسس سەگمەنتىن ەمەس, ەكونوم كلاستاعى تۇرعىن ءۇيدى ايتىپ وتىرمىن. ونىڭ باعاسى وزىنە لايىق, ءبىز مۇندا باعانىڭ كۇرت وزگەرىستەرگە ۇشىراپ جاتقانىن كورىپ وتىرعان جوقپىز. جاڭا سالىق كودەكسىنىڭ قابىلدانۋىنا بايلانىستى ءىرى قۇرىلىس كومپانيالارى بيزنەستى بولشەكتەپ, ۇلكەن پايدا تاباتىن تاجىريبە جويىلاتىن بولادى», دەدى رومان سكليار.
سونىمەن قاتار, ۆيتسە-پرەمەردىڭ مالىمەتىنشە, بيىل قازاقستاندا 19 ميلليون شارشى مەتردەن استام تۇرعىن ءۇي پايدالانۋعا بەرىلەدى.
ول تۇرعىن ءۇي قۇنى جوبالاۋ-سمەتالىق قۇجاتتارعا جانە مەملەكەت تاراپىنان الەۋمەتتىك ساناتتاعى ازاماتتارعا ۇسىنىلاتىن باعدارلامالارعا بايلانىستى قالىپتاساتىنىن اتاپ ءوتتى. مىسالى, «باقىتتى وتباسى» نەمەسە «ناۋرىز جۇمىسكەر» سەكىلدى باعدارلامالار وسى ساناتقا جاتادى.