قىزىلوردا وبلىسىندا ەر ادام جازاسىنىڭ اياقتالۋىنا بەس اي قالعاندا بوستاندىققا شىقتى. بۇل كونستيتۋتسيانىڭ 30 جىلدىعىنا وراي جاريالانعان امنيستيا تۋرالى زاڭ اياسىندا جۇزەگە اسىرىلعان شارالاردىڭ ءبىرى. العاشقى سوتتالعاندار قىزىلوردا وبلىسى بويىنشا قاج دەپارتامەنتىنە قاراستى №60 مەكەمەدەن بوساتىلعان, دەپ حابارلايدى Egemen.kz.
دەپارتامەنتتىڭ ءباسپاسوز قىزمەتىنىڭ مالىمەتىنشە, بوستاندىققا شىققان 55 جاستاعى ەر ادام بۇرىن ۇرلىق جاساعانى ءۇشىن سوتتالعان.
«قاتەلىگىمدى ءتۇسىندىم. ەرەسەك جاستا شالىس باسقانىما وكىنەمىن. ەندى وتباسىمنىڭ قاسىنا ورالىپ, بالالارىمدى تاربيەلەپ, كىنامدى وتەۋگە تىرىسامىن. وسى ۋاقىت ىشىندە بوسقا كەتكەن ساتتەر كوپ بولدى. راقىمشىلىققا ىلىگىپ, بوستاندىققا شىققانىما قۋانىشتىمىن», دەگەن ول.
بۇعان دەيىن №37 مەكەمەدەن دە 3 ادام, سونداي-اق پروباتسيالىق ەسەپتە تۇرعان 15 ادام بوساتىلعانى اتاپ ءوتىلدى.
جالپى, امنيستيا تۋرالى زاڭ قىزىلوردا وبلىسىنداعى قىلمىستىق-اتقارۋ جۇيەسى مەكەمەلەرىندە جازاسىن وتەپ جاتقان 200-دەن استام سوتتالعان ازاماتقا قولدانىلاتىن بولادى.
ايتا كەتەيىك, بۇعان دەيىن راقىمشىلىق اياسىندا ۇلىتاۋ وبلىسىندا دا العاشقى سوتتالعاندار بوستاندىققا شىعارىلعان بولاتىن.