OpenAI كومپانياسى ChatGPT جۇيەسىنە وقىتۋ رەجىمىن ىسكە قوستى. بۇل مۇمكىندىك ستۋدەنتتەرگە دايىن جاۋاپ بەرۋدىڭ ورنىنا, ويلانۋعا, سۇراقتىڭ ءمانىن تۇسىنۋگە, دۇرىس شەشىم تابۋعا كومەكتەسۋدى ماقسات ەتەدى. ەندى جي بىردەن جاۋاپتى ايتپايدى كەرىسىنشە, پايدالانۋشىنى بىرنەشە كەزەڭمەن ويلاۋ, ناقتىلاۋ سۇراقتارىن قويۋ جانە شەشىمدى ءوز سوزىمەن تۇسىندىرۋگە باعىتتايدى, دەپ جازادى Egemen.kz.
مىسالى, ستۋدەنت ەمتيحانعا دايىندالىپ وتىر دەلىك. بۇرىن ول ChatGPT-كە سۇراق قويسا, تىكەلەي جاۋاپ الىپ وتىرعان. ەندى جاڭا رەجىمدە جي: «بۇل سۇراقتا نە ايتىلىپ تۇر دەپ ويلايسىڭ؟» «قانداي نۇسقالار بار, سەن نەگە بىرەۋىن تاڭدادىڭ؟», «سەنىڭ شەشىمىڭنىڭ سەبەبى قانداي؟» دەگەن سياقتى سۇراقتار قويىپ, ويلاۋ قابىلەتىن دامىتۋعا كومەكتەسەدى.
OpenAI بۇل مۇمكىندىكتى مۇعالىمدەرمەن, عالىمدارمەن, ستۋدەنتتەرمەن بىرلەسىپ جاساعان. جوبا «ChatGPT زەرتحاناسى» دەگەن باستاما اياسىندا جۇزەگە اسقان. وندا ستۋدەنتتەر جي-ءدى قالاي قولداناتىنىن ايتىپ, پىكىر ءبولىسىپ وتىرعان.
OpenAI-دىڭ ءبىلىم جونىندەگى ۆيتسە-پرەزيدەنتى ليا بەلسكي: «ەگەر ChatGPT-ءتى رەپەتيتور سياقتى قولدانسا, ول ستۋدەنتتىڭ ءبىلىمىن شىنىمەن جاقسارتادى. ال دايىن جاۋاپ ءۇشىن پايدالانسا – وقۋعا كەدەرگى كەلتىرەدى», دەيدى.
كومپانيا بۇل رەجىمدى ستۋدەنتتەردىڭ كوشىرۋگە ەمەس, ۇيرەنۋگە باعىتتالۋى ءۇشىن جاساپ وتىر. سەبەبى قازىردىڭ وزىندە ءاربىر ءۇشىنشى ستۋدەنت ChatGPT قولدانادى.
جاڭا فۋنكتسيا تەگىن قولدانۋشىلارعا دا, Plus/Pro/Team نۇسقالارىن پايدالانۋشىلارعا دا قولجەتىمدى. جاقىن كۇندەرى ChatGPT Edu جۇيەسىنە دە ەنگىزىلەدى.
بۇل جاڭالىق OpenAI باسشىسى سەم التماننىڭ بولاشاقتا ۋنيۆەرسيتەتتەر ماڭىزىن جوعالتۋى مۇمكىن دەگەن مالىمدەمەسىنەن كەيىن جاريالانىپ وتىر. ول جي دامىعان سايىن وقۋ جۇيەسى دە مۇلدە باسقا بولاتىنىن ايتادى.