قازاقستان سۋ سپورتى سالاسىنداعى ءىرى جەتىستىككە قول جەتكىزدى – جۇزۋدەن Silk Road-2026 الەم كۋبوگىنىڭ فينالدىق كەزەڭى العاش رەت ەلىمىزدە وتەدى. ءدۇبىرلى دودانى باس قالا – استانا قابىلدايدى. بۇل تۋرالى سينگاپۋردە وتكەن World Aquatics كونگرەسىندە بەلگىلى بولدى. بيىل سۋ سپورتى تۇرلەرىنەن World Aquatics Championships 2025 چەمپيوناتى ازيانىڭ وسى ەلىندە ءوتىپ جاتىر. وعان 200 ەلدەن 1000-نان استام سپورتشى قاتىسىپ, ونىڭ ىشىندە وتانداستارىمىز دا باق سىناۋدا.
ەلىمىز تاريحتا العاش رەت جۇزۋدەن الەمدىك دەڭگەيدەگى اۋقىمدى جارىس مەيماندارىن قابىلداماق. Silk Road-2026 حالىقارالىق ءتۋرنيرىنىڭ العاشقى كەزەڭى ازەربايجان استاناسى باكۋدە, ال ەكىنشى كەزەڭى كورشىلەس وزبەكستاننىڭ باس قالاسى تاشكەنتتە وتپەك. وسىلايشا حالىقارالىق شارا ۇلى جىبەك جولىنىڭ بويىنداعى ءۇش ەلدىڭ استاناسىن بىرىكتىرەدى.
-تۋرنير 25 مەترلىك باسسەيندە وتەدى, - دەيدى ۇيىمداستىرۋشىلار. الەم كۋبوگى ەلوردادا وليمپيادا ويىندارىنىڭ, الەم چەمپيوناتتارىنىڭ جەڭىمپازدارى مەن جۇلدەگەرلەرى, سونداي-اق الەمدىك رەكورد ورناتقان ايگىلى سپورتشىلاردىڭ باسىن بىرىكتىرمەك. ال جارىس كەزەڭدەرىنىڭ ناقتى وتەتىن كۇنى تۋرالى اقپارات الداعى ۋاقىتتا بەلگىلى بولماق.
مۇنداي حالىقارالىق ءىرى شارانىڭ ەلىمىزدە ءوتۋى – سۋ سپورتىنا جاڭا سەرپىن بەرىپ قانا قويماي, قازاقستاننىڭ سپورت سالاسىنداعى بەدەلىن حالىقارالىق دەڭگەيدە ارتتىرۋعا مۇمكىندىك بەرەدى. وعان قازاقستاننىڭ سۋ سپورتى فەدەراتسياسىنىڭ جاڭا باسشىلىعىنىڭ بەلسەندى جانە جۇيەلى جۇمىسى ۇلكەن ىقپال ەتتى. نۇرلان جاقىپوۆ باسشىلىق ەتەتىن فەدەراتسيا حالىقارالىق سەرىكتەستىكتى نىعايتىپ, ينفراقۇرىلىمدى دامىتۋ جانە ەلىمىزدىڭ الەمدىك سپورت ارەناسىنداعى ورنىن نىعايتۋ باعىتىندا ناتيجەلى جۇمىستار جۇرگىزىپ كەلەدى.
بۇل ورايدا ەلىمىزدە سۋ سپورتىن دامىتۋعا «سامۇرىق-قازىنا» قورى ەلەۋلى ۇلەسىن قوسىپ وتىر. ۇلتتىق ءال-اۋقات قورى ەلىمىزدىڭ سۋ سپورتى فەدەراتسياسىنىڭ باس سەرىكتەسى. سونىمەن قاتار, «Sport Qory», قازاقستان رەسپۋبليكاسىنىڭ تۋريزم جانە سپورت مينيسترلىگى جانە ۇلتتىق وليمپيادا كوميتەتى دە فەدەراتسيانىڭ باستامالارىنا جان-جاقتى قولداۋ كورسەتىپ كەلەدى.
وسىلايشا, «سامۇرىق-قازىنا» قورىنىڭ قولداۋىمەن استانا جۇزۋدەن الەمدىك دەڭگەيدەگى جارىستى وتكىزەتىن قالا رەتىندە تانىلىپ وتىر. بۇل – تەك سپورتتىق قانا ەمەس, مادەني جانە يميدجدىك تۇرعىدا دا ۇلكەن جەتىستىك.
استانادا وتەتىن Silk Road-2026 فينالى – قازاقستاننىڭ الەمدىك سپورت قاۋىمداستىعىنداعى ورنىن ايقىندايتىن ماڭىزدى كەزەڭ بولماق.
جانسايا قاپاسقىزى