استاناداعى "بيگ شانحاي" ساۋدا ۇيىندەگى ءىرى ورتتەن كەيىن BAQ.KZ رەداكتسياسى بازار اكىمشىلىگىنەن رەسمي تۇسىنىكتەمە سۇراتقان بولاتىن. ءبىر اپتا وتكەن سوڭ رەداكتسيا ساۋالدارىنا جاۋاپ كەلدى, دەپ حابارلايدى Egemen.kz.
اكىمشىلىك مالىمەتىنشە, قازىرگى تاڭدا 300 كاسىپكەر كومەككە جۇگىنگەن. ولاردىڭ قاتارىندا 262 ستاتسيونارلىق ساۋدا ورنىن جالعا العاندار بار. ودان بولەك بانكومات, ماسساج كرەسلوسى, تەرمينال, شاعىن ساۋدا نۇكتەلەرى سياقتى ميكروبيزنەس وكىلدەرى قوسىلادى. شىعىن كولەمىن انىقتاۋ جۇمىستارى ءالى دە جالعاسىپ جاتىر.
بازار باسشىلىعى العاشقى كۇننەن باستاپ وقيعا ورنىندا بولىپ, جالعا الۋشىلارمەن تىكەلەي جۇمىس ىستەپ جاتقانىن اتاپ ءوتتى. باستى ماقسات كاسىپكەرلەرگە جۇمىسىن جالعاستىرۋعا مۇمكىندىك بەرۋ.
قازىرگى تاڭدا ازىق-ت ۇلىك ونىمدەرىن ساتۋمەن اينالىسقان جانە ەت پاۆيلونىندا جۇمىس ىستەگەن كاسىپكەرلەردىڭ 100 پايىزى كورشىلەس ورنالاسقان "وردابازار" اۋماعىنداعى ساۋدا ورىندارىنا ورنالاستىرىلدى, - دەدى اكىمشىلىك.
ءىرى كاسىپكەرلەر بوس تۇرعان عيماراتتارعا نەمەسە بۇرىنعى جۇمىس ىستەپ تۇرعان نۇكتەلەردى قىسقارتۋ ارقىلى ورنالاستىرىلعان. سونىمەن قاتار, "وردابازار" اۋماعىنا 142 ساۋدا كونتەينەرى ورناتىلىپ, جالپى 7000 شارشى مەترگە جۋىق ساۋدا الاڭى بەرىلگەن.
اكىمشىلىك زارداپ شەككەن كاسىپكەرلەرگە ساۋدا ورىندارى ءبىر جىلعا دەيىن تەگىن بەرىلەتىنىن مالىمدەدى.
ساۋدا الاڭدارى ءبىر جىل مەرزىمگە اقىسىز ۇسىنىلادى. ال سالىقتىق جەڭىلدىكتەرگە قاتىستى شەشىمدەر مەملەكەتتىك دەڭگەيدە قابىلدانادى. بۇل ءبىزدىڭ قۇزىرەتىمىزگە كىرمەيدى, - دەدى بازار اكىمشىلىگى.
بۇدان بولەك, "بيگ شانحاي" اكىمشىلىگى ساۋدا نىسانىن تولىق جاڭعىرتۋدى وسى جىلدىڭ سوڭىنا دەيىن اياقتاۋدى جوسپارلاپ وتىر.
قازىرگى ۋاقىتتا كاسىپكەرلەر ۋاقىتشا "وردابازاردا" جانە ارنايى ورناتىلعان كونتەينەرلەردە جۇمىسىن جالعاستىرۋدا. الاش تاس جولى, 32 مەكەنجايىنداعى "شانحاي" ساۋدا ورنى "نارىقتاردى جاڭعىرتۋ" باعدارلاماسى اياسىندا قايتا جوندەۋدەن وتۋدە, - دەپ حابارلادى باسشىلىق.