ەل ۇكىمەتى گاز سالاسىن دامىتۋعا تىڭ سەرپىن بەرىپ, جاڭا ينۆەستيتسيالار تارتۋعا نيەتتى. پرەزيدەنتتىڭ ەلىمىزدى تولىق گازداندىرۋ تۋرالى تاپسىرماسىنا ساي, بۇل سالادا جۇيەلى جۇمىستار اتقارىلىپ جاتىر. پرەمەر-مينيستر ولجاس بەكتەنوۆتىڭ ايتۋىنشا, نەگىزگى ماقسات – ەلىمىزدىڭ سولتۇستىك جانە شىعىس وڭىرلەرىن كوگىلدىر وتىنمەن قامتاماسىز ەتىپ, حالىقتىڭ ءومىر ءسۇرۋ ساپاسىن ارتتىرۋ, دەپ جازادى Egemen.kz.
بۇل باعىتتا جۇزەگە اسىرىلىپ جاتقان باستى جوبالاردىڭ ءبىرى – «سارىارقا» ماگيسترالدىق گاز قۇبىرى. قازىرگى تاڭدا ونىڭ ەكىنشى, ءۇشىنشى جانە ءتورتىنشى كەزەڭدەرىن سالۋ جوسپارلانىپ وتىر. گازدى تۇراقتى جەتكىزۋدى قامتاماسىز ەتۋ ءۇشىن «بەينەۋ – بوزوي – شىمكەنت» ماگيسترالدىق قۇبىرىنىڭ ەكىنشى جەلىسىن تارتۋ كوزدەلگەن. جاڭا جەلىنىڭ قۋاتى – جىلىنا 15 ميلليارد تەكشە مەتر. ال العاشقى كەزەڭ اياسىندا ءۇش بىردەي كومپرەسسورلىق ستانسامەن جابدىقتالاتىن, 1 450 شاقىرىمعا سوزىلاتىن گاز قۇبىرى سالىنىپ جاتىر. بۇل قۇرىلىس 2026 جىلى اياقتالادى دەپ كۇتىلەدى.
ۇكىمەت بۇعان قوسا, شەكارالاس ەلدەرمەن كەلىسسوزدەر جۇرگىزىپ, سىرتتان گاز يمپورتتاۋ ماسەلەسىن دە نازاردا ۇستاپ وتىر. بۇل – اسىرەسە سولتۇستىك جانە شىعىس قازاقستان وبلىستارى ءۇشىن ماڭىزدى قادام.
الايدا, گاز سالاسىن دامىتۋ تەك ينفراقۇرىلىممەن شەكتەلمەيدى. ولجاس بەكتەنوۆتىڭ ايتۋىنشا, بۇل سالاعا ينۆەستيتسيا تارتۋ ءۇشىن باعا ساياساتى دا تەڭگەرىمدى بولۋى قاجەت.
ء«بىزدىڭ ىشكى نارىقتاعى گاز باعاسى الەمدىك نارىقتان الدەقايدا ارزان, سوندىقتان ءبىز بىرقالىپتى, بۇرمالانباعان جاعداي تۋعىزۋ ماقساتىندا باعانى بىرتىندەپ كوتەرىلۋىن قاداعالايتىن بولامىز. سوندا گاز سالاسى ينۆەستيتسيالىق تارتىمدى بولىپ, داميتىن بولادى», دەدى ۇكىمەت باسشىسى.
جالپى, ەلىمىزدىڭ گازداندىرۋ ساياساتى – ەكونوميكالىق تيىمدىلىك پەن الەۋمەتتىك ماڭىزدىلىقتى قاتار ۇستانعان اۋقىمدى باعدارلاما. الداعى جىلدارى ونىڭ ناقتى ناتيجەسىن كورۋىمىز بەك مۇمكىن.