جاساندى ينتەللەكتپەن سويلەسكەن اڭگىمەلەرىڭىز قاۋىپسىز ءارى قۇپيا دەپ ويلاساڭىز, قاتەلەسەسىز. OpenAI كومپانياسىنىڭ باس ديرەكتورى سەم التمان ChatGPT-مەن جازىسقان حاتتار زاڭ جۇزىندە قورعالمايتىنىن جانە قاجەت جاعدايدا سوتتا ايعاق رەتىندە پايدالانىلۋى مۇمكىن ەكەنىن ايتتى, دەپ جازادى Egemen.kz.
«بۇل – وتە ۇلكەن ماسەلە. سەبەبى كوپتەگەن ادام ChatGPT-ءدى ءوز ويلارىن ورتاعا سالاتىن سەنىمدى كەڭەسشى رەتىندە كورە باستادى. ولار جاساندى ينتەللەكتكە وتە جەكە, ءتىپتى قۇپيا اقپاراتتارىن ايتىپ جاتادى. الايدا بۇل اڭگىمەلەر دارىگەرمەن, ادۆوكاتپەن نەمەسە ءدىن قىزمەتكەرىمەن سويلەسكەندەگىدەي قۇپيا دەپ سانالمايدى», دەدى سەم التمان.
ول بۇل جاعدايدىڭ قۇقىقتىق تۇرعىدا رەتتەلمەگەنىن ايتىپ, مەملەكەتتەر مەن تەحنولوگيالىق كومپانيالاردى جي قۇرالدارىن پايدالانۋشىلاردىڭ قۇقىعىن قورعاۋعا شاقىردى.
«بىزگە جي-مەن جاسالعان جازباشا نەمەسە اۋىزشا بايلانىستاردىڭ قۇقىقتىق مارتەبەسىن ناقتىلايتىن زاڭ كەرەك. قازىر تسيفرلىق داۋىردە جەكە ومىرگە سىرتتان باقىلاۋ تىم جيىلەپ بارادى. بۇل ءۇردىس قوعام ءۇشىن قاۋىپتى باعىتقا اينالۋى مۇمكىن», دەپ ەسكەرتتى التمان.
مامانداردىڭ ايتۋىنشا, قازىرگى تاڭدا جي جۇيەلەرى ارقىلى جينالعان دەرەكتەردىڭ قايدا, قالاي ساقتالاتىنى جانە كىمدەرگە قولجەتىمدى بولاتىنى ناقتى بەلگىلەنبەگەن. سوندىقتان دا پايدالانۋشىلارعا جاساندى ينتەللەكتپەن قۇپيا اقپارات بولىسپەۋگە كەڭەس بەرەدى.