QazaqGaz Aimaq كومپانياسى تۇتىنۋشىلاردان گاز ەسەپتەگىش قۇرىلعىلارىنىڭ كورسەتكىشتەرىن اۆتوماتتى تۇردە قابىلداۋعا ارنالعان جاساندى ينتەللەكت (جي) نەگىزىندەگى ءموبيلدى قوسىمشانى ەنگىزۋدى باستادى. بۇل تۋرالى ەنەرگەتيكا مينيسترلىگى حابارلادى, دەپ جازادى Egemen.kz.
تسيفرلىق شەشىم قازىرگى ۋاقىتتا قىزىلوردا, قوستاناي جانە تۇركىستان وبلىستارىندا پيلوتتىق رەجيمدە سىناقتان ءوتىپ جاتىر. قوسىمشانى 7 مىڭنان استام تۇتىنۋشى جۇكتەپ ۇلگەرگەن. العاش بولىپ بۇل قىزمەتتى تۇركىستان وبلىسىنىڭ تۇرعىندارى پايدالانا باستادى.
ءموبيلدى قوسىمشانىڭ جۇمىس ىستەۋ قاعيداسى قاراپايىم: تۇتىنۋشى گاز ەسەپتەگىشتىڭ فوتوسۋرەتىن ءتۇسىرىپ, جۇيەگە جۇكتەيدى. جاساندى ينتەللەكت تەحنولوگياسى سانداردى اۆتوماتتى تۇردە تانيدى جانە وڭدەيدى. بۇل ءوز كەزەگىندە ەسەپتەگىشتەردى تىركەۋ بارىسىن جەدەلدەتىپ, ادامي فاكتوردان تۋىندايتىن قاتەلىكتەردى ازايتادى, سونداي-اق باقىلاۋشى مامانداردىڭ ۇيگە كەلۋ قاجەتتىلىگىن جويادى.
كومپانيا مالىمەتىنشە, جاڭا جۇيە وپەراتورلارعا تۇسەتىن جۇكتەمەنى ازايتىپ, ەسەپ ايىرىسۋ پروتسەسىنىڭ اشىقتىعىن قامتاماسىز ەتۋگە مۇمكىندىك بەرەدى. سونىمەن قاتار, گازدى ۇنەمدەپ تۇتىنۋ مادەنيەتىن قالىپتاستىرۋعا ىقپال ەتەدى.
جاقىن ارادا قوسىمشانىڭ فۋنكتسيونالى كەڭەيتىلەدى. تۇتىنۋشىلارعا تولەم تاريحىن كورۋ, ەسەپتەگىشتى تەكسەرۋ مەرزىمدەرى تۋرالى ەسكەرتۋلەر الۋ جانە گاز جەلىلەرىندە جۇرگىزىلەتىن جوسپارلى جوندەۋ جۇمىستارى جونىندە حابارلامالار جىبەرۋ مۇمكىندىگى قاراستىرىلىپ وتىر.
بۇدان بولەك, ۆيرتۋالدى كومەكشى قىزمەتى ەنگىزىلىپ, ادال تۇتىنۋشىلارعا ارنالعان بونۋستىق جانە كەشبەك جۇيەسى ىسكە قوسىلادى دەپ جوسپارلانىپ وتىر.
ايتا كەتەيىك, بۇعان دەيىن دەنساۋلىق ساقتاۋ مينيسترلىگى دياگنوز قويۋ دالدىگى 80%-عا جەتەتىن جاساندى ينتەللەكتكە نەگىزدەلگەن تەراپەۆت سەرۆيسىن سىناقتان وتكىزىپ جاتقانىن مالىمدەگەن بولاتىن.