UFC-ءدىڭ تانىمال جاۋىنگەرى شاۆكات راحمونوۆتىڭ جۇبايى كولىك تىزگىنىنە يە بولا الماي اپاتقا ۇشىراعان. جول-كولىك وقيعاسى 25 شىلدە الماتى - ەكاتەرينبۋرگ تاس جولىنىڭ 296-شاقىرىمىندا بولعان, دەپ جازادى Egemen.kz.
گۇلايىم راحمونوۆا جۇرگىزگەن Toyota Land Cruiser كولىگىندە 3 جاسار بالاسى مەن تاعى ەكى ادام بولعان. باق-تاعى اقپارات بويىنشا ولار قاراعاندىدان الماتىعا بەت العان.
اپات سالدارىنان 39 جاستاعى جولاۋشى ز.ا وقيعا ورنىندا كوز جۇمسا, 35 جاستاعى ا.س مويىنقۇم اۋداندىق اۋرۋحاناسىنا اپارار جولدا جان تاپسىرعان.
ال شاۆكات راحمونوۆتىڭ جۇبايى مەن 2022 جىلى تۋعان بالاسى شۋ اۋداندىق اۋرۋحاناسىنا جەتكىزىلگەن. مەديتسينا ماماندارى ولاردىڭ دەنساۋلىق جاعدايىن ورتاشا اۋىر, تۇراقتى دەپ حابارلادى. گ.راحمونوۆا مەن بالاعا حيرۋرگيالىق وپەراتسيا جاساۋدىڭ قاجەتى بولماعان. قازىر ناۋقاستار تراۆموتوليا بولىمىنە جاتقىزىلىپ, دارىگەرلەردىڭ باقىلاۋىنا الىنعان.
پوليتسەيلەر قر قىلمىستىق كودەكسىنىڭ 345-بابى «ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جول قوزعالىسى ەرەجەسىن بۇزۋ» بويىنشا سوتقا دەيىنگى تەرگەۋ امالدارىن باستاعان. وقيعانىڭ ءمان-جايى تەرگەۋ مۇددەسى ءۇشىن ازىرگە جاريالانباعان.
ايتا كەتەيىك, شاۆكات راحمونوۆ 27 شىلدە كۇنى ابۋ-دابيدە UFC on ABC 9 تۋرنيرىندە جەڭىسكە جەتكەن اسۋ الماباەۆتىڭ جەكپە-جەگىندە بوي كورسەتىپ, سەكۋندانت بولعان ەدى.