اقش-تىڭ ۇلتتىق اەروناۆتيكا جانە عارىش كەڭىستىگىن زەرتتەۋ باسقارماسىنىڭ (NASA) شتاتتىق قۇرامى 20 پايىزعا قىسقارادى. بۇل تۋرالى اگەنتتىكتىڭ ءباسپاسوز حاتشىسى شەريل ۋورنەر ءمالىم ەتتى, دەپ جازادى Egemen.kz.
NASA تاراتقان رەسمي حابارلامادا 3 870 قىزمەتكەر جۇمىستان ءوز ەركىمەن كەتۋگە كەلىسىم بەرگەنى كورسەتىلگەن. وسىلايشا, اگەنتتىكتە شامامەن 14 مىڭ ادام قالادى. بۇل سان الداعى اپتالاردا قايتا قارالۋى مۇمكىن.
قىسقارتۋ دونالد ترامپ اكىمشىلىگى ۇسىنعان «كەيىنگە شەگەرىلگەن جۇمىستان بوساتۋ» (Deferred Resignation Program – DRP) باعدارلاماسى اياسىندا جۇزەگە اسۋدا. ءبىرىنشى كەزەڭدە 870 ادام, ال ەكىنشى كەزەڭدە تاعى 3 000-عا جۋىق قىزمەتكەر جۇمىستان كەتۋ تۋرالى ءوتىنىش بەرگەن.
ودان بولەك, 500 قىزمەتكەر ەرىكتى تۇردە زەينەتكە شىعۋ جانە باسقا دا جەڭىلدىك باعدارلامالارى ارقىلى جۇمىستان بوساتىلعان.
NASA باسشىلىعى بۇل قادام اگەنتتىكتىڭ تيىمدىلىگىن ارتتىرىپ, اي مەن مارسقا ۇشۋدى قامتيتىن «التىن عاسىر» باعدارلامالارىن جالعاستىرۋعا مۇمكىندىك بەرەدى دەپ وتىر.
الايدا اگەنتتىك ىشىنەن قارسىلىق تۋىنداۋدا. وتكەن اپتادا بۇرىنعى جانە قازىرگى 362 قىزمەتكەر, ونىڭ ىشىندە عالىمدار, «ۆويادجەر دەكلاراتسياسى» اتتى اشىق حات جاريالاپ, بيۋدجەت قىسقارتۋلارىنا, گرانتتاردىڭ توقتاتىلۋىنا جانە ۇيىم ىشىندەگى «ۇنسىزدىك مادەنيەتىنە» الاڭداۋشىلىق ءبىلدىردى.
ايتا كەتەيىك, ترامپتىڭ 2026 جىلعى فەدەرالدى بيۋدجەت جوباسىندا NASA-نىڭ عىلىمي باعىتىنا بولىنەتىن قارجى ەكى ەسەگە قىسقارىپ, جالپى قارجىلاندىرۋ كولەمى 24%-عا ازايتىلعان.