قۇتقارۋشىلاردىڭ قونىستويى

توتەنشە جاعدايعا ساقاداي سايلانىپ, ادام ءومىرىن ساقتاپ قالۋدا وت پەن سۋعا تۇسۋدەن تايىنباي جەدەل ارە­كەت ەتەتىن قۇتقارۋشىلاردىڭ, ءورت سون­دىرۋشىلەردىڭ جۇمىسى جەڭىل ەمەس. اسىرەسە تەحنوگەندىك, تابيعي اپاتتاردا, كوكتەمگى سۋ تاسقىنى كەزىندە اپات ايماعىنا ءوڭىر-وڭىردەن بارىپ, كومەككە ۇمتىلعان قۇتارۋشىلارىڭ ءىسى ناعىز ەرلىك. قۇتقارۋشى, ءورت سوندىرۋشىلەرگە قانداي سىي-قۇرمەت كورسەتسەك تە جاراسادى. ولاردىڭ الەۋمەتتىك جاعدايى, قاۋىپسىزدىگى ەشقاشان نازاردان تىس قالماۋعا ءتيىس. سالا ماماندارىنا ءۇي, قىزمەتتىك كولىك تابىستاۋ راسىمىنە كەلگەن توتەنشە جاعدايلار ءمينيسترى, گەنەرال-مايور شىڭعىس ءارىنوۆ قۇتقا­رۋشىلاردىڭ الەۋمەتتىك جاعدايى جىل ساناپ جاقسارا بەرەتىنىن ايتتى.

«بىلتىردان بەرى قۇتقارۋشىلاردىڭ الەۋمەتتىك جاعدايىنا بارىنشا كوڭىل ءبولىنىپ جاتىر. كوپتىڭ تىلەگىمەن ءورت سوندىرۋشىلەردىڭ تۇرعىن ءۇي تولەمدەرى ماسەلەسى شەشىلدى. زاڭعا ءتيىستى تۇزەتۋ­لەر ەنگىزىلدى. قانداي دا ءبىر سەبەپتەرمەن تۇرعىن ءۇي تولەمىن الا الماي­تىن قىزمەتكەرلەردى دە كومەكسىز قالدىر­مايمىز. مىسالى, ءبىز ءىرى قالالارمەن قاتار, وڭىرلەردە قىزمەتتىك جاتاقحانالار سالۋدى ويلاستىرىپ وتىرمىز. قازىردىڭ وزىندە تۇرعىن ءۇي قورى ارقىلى ۋاقىتشا پاتەردە تۇرىپ جاتقان قۇتقارۋشىلار بار. راس, ۋاقىتشا تۇرۋعا بەرىلەتىن ۇيلەردىڭ كوبىندە جاعداي ءماز-ەمەس. بىراق ءبىز تۇرعىن ءۇي قورىمەن بىرگە جوندەۋ جۇمىستارىنا كىرىستىك. بۇگىن باسپانالى بولىپ جاتقان سالا قىزمەتكەرلەرىن قۇتتىقتايمىن. مۇنىڭ بارلىعى مەملەكەت باسشىسىنىڭ قولداۋىمەن ىسكە اسىپ جاتقان يگىلىكتەر ەكەنىن اتاپ وتكىم كەلەدى», دەگەن ش.ءارىنوۆ سالا ماماندارىنا پاتەر, قىزمەتتىك كولىك كىلتىن تاپسىردى.

ءۇيلى بولعان ازاماتتاردىڭ قاتارىندا قۇتقارۋشىلار, جۇرگىزۋشىلەر, بولىمشە كومانديرلەرى بار. نۇرجان ءامىروۆ 16-ءورت ءسوندىرۋ بولىمىندە جۇرگىزۋشى. سالادا جۇمىس ىستەپ جۇرگەنىنە 20 جىلدان اسقان.

«بۇگىن وتباسىمىزدا ۇلكەن مەرەكە. جىلدار بويى ارمانداعان باس­پاناعا قول جەتكىزىپ وتىرمىز. ءورت ءسوندىرۋ قىزمەتىندەگى جۇمىسىمىزدى ەسكەرىپ, مارتەبەمىزدى كوتەرىپ جاتقان ارىپتەستەرگە, باسشىلىققا العىس ايتامىن. وسى جىلدار ارالىعىندا سوزىنە دە, ىسىنە دە بەرىك ناعىز مىقتى قىزمەت­كەرلەرمەن يىق تىرەسە جۇمىس ىستەدىك. ءورت سوندىرۋشىلەر اۋا رايىنا, كۇن-تۇنگە قارامايدى. سۋىق ايماقتىڭ ايازدى كۇندەرى قار قۇرساۋىنان تالاي كولىكتى الىپ شىقتىق.  توتەنشە جاعدايدا ءبىر مينۋت ۋاقىتىمىزدى جوعالتپاي, جەدەل جەتۋگە تىرىسامىز. ەكىنىڭ ءبىرى ءورت ءسوندىرۋشى بولا بەرمەيدى. سالاداعى ارىپتەستەرىمە اماندىق, ساۋلىق تىلەيمىن. ەڭبەكتەرى اقتالا بەرسىن»,  دەدى ن.ءامىروۆ.

توتەنشەلىكتەردىڭ ىشىندە بىلتىر ءۇيلى بولعاندار دا بار. ناقتىلاساق, بىل­تىر استانا قالاسىنىڭ تجد قىزمەتكەرلەرىنە 50 پاتەر بەرىلىپتى. قىزمەتكەرلەردى ءتۇرلى باعدارلاما اياسىندا نەمەسە ۋاقىتشا بولسا دا تۇرعىن ۇيمەن قامتۋ جۇمىستارى بيىل دا جالعاسادى. وسى جولى 15 قىزمەتكەر ءۇيلى بولسا, جىل سوڭىنا دەيىن تاعى بىرنەشە قۇتقارۋشى, ءورت سوندىرۋشىگە ءۇي ءتيىپ قالۋعا ءتيىس.

ءۇيلى بولعان توتەنشەلىكتەردىڭ ءبىرى سەرىك ەسەنوۆ ەڭبەك جولىن ءورت ءسوندىرۋشى بولىپ باستاعان. قازىر اسا ماڭىزدى نىسانداردى قورعاۋ ءبولىمىن باسقارادى. كەلەر جىلى زەينەتكە شىعاتىن مەرزىم دە تاياپ تۇر. تۇرعىن ءۇي – ءوز ىسىنە بەرىلگەن ماماننىڭ عانا ەمەس, وتاعاسىنا ارقا سۇيەيتىن ءبۇتىن وتباسىنىڭ قۋانىشى. سالتاناتتى ءساتتى تاماشالاۋعا سەرىكتىڭ وتباسى, جارى انار ەسەنوۆا دا كەلىپتى.    

«جولداسىم 9-بولىمشەنىڭ كومانديرى بولىپ جۇمىس ىستەيدى. ەڭبەك جولىن 2002 جىلى قاراپايىم ءورت ءسوندىرۋشى بولىپ باستاعان. وتباسىن قۇرعانىمىزعا 20 جىل بولىپتى. ءۇش بالامىز بار. بۇگىن وتباسىمىزبەن كەلىپ, قۋانىشتى ساتكە كۋا بولدىق. قۇتقارۋشىنىڭ جارى رەتىندە جۇمىس وڭاي ەمەسىن جاقسى بىلەمىن. قاۋىپ-قاتەردەن ساق ءجۇرسىن دەپ كۇن, مەيلى ءتۇن بولسىن, جۇمىسقا كەتەردە تىلەۋىن تىلەپ شىعارىپ سالامىز. سۋ تاسقىنى كەزىندە دە اپات ايماقتارىنا باردى. وسى سالادا ەڭبەك ەتىپ جۇرگەن بارلىق ماماننىڭ قۋانىشى ورتايماسىن, الەۋمەتتىك جاعدايى جاقسارا بەرسىن», دەيدى ا.ەسەنوۆا.

ەلدە بولىپ جاتقان توسىن وقيعالار توتەنشە جاعدايلار قىزمەتىنە ساپالى, جول تالعامايتىن كولىك قاجەت ەكەنىن تەرەڭ ۇقتىرادى. اسىرەسە سۋ تاسقىنى كەزىن­دە قىزمەتتىك كولىكتەر جولدا قال­دىر­ماي, قاجەتكە جاراسا ءجون. ءتۇرلى قۇتقا­رۋ وپەراتسياسىنا جەدەل جەتۋگە دە  جاڭا كولىكتەر اۋاداي قاجەت. وسىنى ەسكە­رە كەلە توتەنشە جاعدايلار دەپار­تامەن­تىنىڭ بولىمشەلەرىنە Hyundai Tucson, Staria, Toyota Hilux سىندى كولىك­تەر تاپسىرىلدى.

كەز كەلگەن توسىن وقيعادا جەدەل ارەكەت ەتەتىن توپتىڭ الەۋمەتتىك جاعدايى وڭالسا, قۇرال-جابدىقتارى, تەحنيكالارى تۇگەندەلسە, ونىڭ بارلىعى ءتۇپتىڭ-تۇبىندە قىزمەت كورسەتۋ ساپاسىنا اسەر ەتەدى.