سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ تۇركىستان وبلىسىنا جۇمىس ساپارىمەن بارىپ, جەرگىلىكتى ديقانداردى سۋارمالى سۋمەن قامتاماسىز ەتۋ جۇمىستارىنىڭ بارىسىمەن تانىستى.
سۋ ۆەدومستۆوسىنىڭ باسشىسى قازاقستان مەن وزبەكستان اراسىنداعى ترانسشەكارالىق سۋدى بولەتىن «دوستىق» مەملەكەتارالىق كانالىنا باردى. قازىر سۋ ءبىزدىڭ ەلگە بۇرىن قول جەتكىزىلگەن حالىقارالىق كەلىسىمدەرگە سايكەس جەتكىزىلىپ, جەتىساي جانە ماقتاارال اۋداندارىنداعى ەگىس الاڭدارىن سۋارۋعا پايدالانىلادى.
بۇگىندە «قازسۋشاردىڭ» تۇركىستانداعى فيليالى ماقتاارال اۋدانىنىڭ شارۋالارىمەن سۋارمالى سۋ بەرۋگە 3 223 كەلىسىمشارت جاساستى, جەتىساي اۋدانى بويىنشا 1 492 كەلىسىمشارت جاسالدى. قازىر جەتىساي اۋدانىندا سۋارمالى جەر كولەمى 47 332 گا, ماقتاارال اۋدانىندا 27 255 گا.
ودان كەيىن مينيستر «ماشينالىق ادىسپەن سۋ كوتەرۋ كانالىنىڭ» جۇمىسىمەن تانىستى. «قازسۋشاردىڭ» تۇركىستانداعى فيليالى نىساندى مەحانيكالىق جولمەن تازالاۋدى اياقتاپ قالدى.
«كەلىسىمشارت جاساعان سۋ پايدالانۋشىلارمەن مىندەتتەمەلەردى ورىنداۋ ءۇشىن كانالدار بويىنشا كەزەكپەن سۋ بەرۋ جۇرگىزىلەدى, ال مينيسترلىكتىڭ جۇمىس توبى مەن ارال-سىرداريا باسسەيندىك ينسپەكتسياسى سۋ پايدالانۋدىڭ زاڭدىلىعىن قاتاڭ باقىلاۋدا ۇستايدى. سونداي-اق سۋدى كەلىسىمشارتسىز تۇتىنعاندارعا جانە سۋ جەتكىزۋشىنىڭ كەلىسىمىنسىز وسىرىلەتىن داقىلداردىڭ ءتۇرىن وزگەرتكەندەرگە ايىپپۇل قاراستىرىلعان. بىراق ديقاندار دا سۋ ۇنەمدەۋ تەحنولوگيالارىنا كوشىپ, ىلعالدى كوپ قاجەت ەتەتىن داقىلداردى ەگۋدى ازايتۋ ارقىلى سۋ رەسۋرستارىن ۇنەمدەۋگە ءوز ۇلەستەرىن قوسۋى كەرەك. مەملەكەت بۇعان سۋبسيديالار تۇرىندە بارلىق قاجەتتى جاعدايدى جاسادى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
بيىل تۇركىستان وبلىسىندا كۇرىش ەگۋ جوسپارى 3,3 ەسەدەن اسىپ كەتكەنىن ەسكە سالا كەتەيىك. سۋارمالى سۋ تاپشىلىعى قاۋپىمەن 4000 گا شەكتى كولەمگە قاراماستان, «قازسۋشاردىڭ» جەرگىلىكتى فيليالى ديقاندارمەن 13 258 گا كۇرىش القاپتارىن سۋارۋعا 1 047 كەلىسىمشارت جاساسقان. وسىعان بايلانىستى فيليالدىڭ بىرقاتار باسشىسىنا قاتاڭ سوگىس بەرىلدى.
بۇعان دەيىن سۋ رەسۋرستارى جانە يرريگاتسيا مينيسترلىگى قازاقستاننىڭ وڭتۇستىگىندە سۋارۋ كەزەڭىنىڭ تۇراقتى ءوتۋىن قامتاماسىز ەتۋ ءۇشىن ارنايى جۇمىس توپتارىن قۇرعان بولاتىن. بۇل توپتار جەرگىلىكتى اتقارۋشى ورگاندارمەن بىرلەسىپ تاۋلىك بويى كەزەكشىلىك جۇرگىزەدى. تۇركىستان وبلىسىنداعى ۆەگەتاتسيالىق كەزەڭ مينيسترلىكتىڭ باقىلاۋىندا.