كينوپويسك جەرگىلىكتى كونتەنتتى دامىتۋدى جالعاستىرىپ جاتىر, جاقىندا ونلاين-پلاتفورما ەلدە ءوزىنىڭ جاڭا ءتول سەريالى — Streetحانا-نىڭ ءتۇسىرىلىمىن باستادى, دەپ جازادى Egemen.kz.
جاڭا جوبا — ۇلتتىق ناقىشتاعى رومانتيكالىق كومەديا. ول «سون-دجەنى ۇستاپ, قاش», «دامدەۋىشتەر مەن قۇمارلىق» جانە ء«اسۇي» سياقتى تانىمال تۋىندىلاردىڭ ەستەتيكاسى مەن اتموسفەراسىن ەسكە سالادى. سيۋجەتتە رومانتيكا, ءازىل جانە ءدام تاتىپ كورگىڭ كەلەتىن تاعامدار كورىنىس تاپقان.
سەريال تۋعانىنان اسپازدىققا بەيىمى بار اۋىلدىق جىگىت جايىندا. ول ءبىر كۇنى ءوزىنىڭ تۋعان اكەسى ەلدەگى ەڭ ۇزدىك اسپاز ەكەنىن بىلەدى. جىگىت اكەسىنىڭ مەيرامحاناسىنا قاراما-قارسى ورىن تەپكەن كوشە تاعامدارىن ازىرلەيتىن دۇڭگىرشەككە جۇمىسقا ورنالاسادى. ماقساتى — ءوزىن تاستاپ كەتكەن اكەسىنىڭ قاتەلىك جاساعانىن دالەلدەۋ جانە ەلدەگى ەڭ ۇزدىك اسپاز اتاعىن تارتىپ الۋ.
«ماعان قازاقستان ءۇشىن توسىن وقيعا — اسپازدىق تاقىرىپ ۇنادى. ءبىزدىڭ ەلدە ءتۇرلى تاعام بار, ال بۇل سەريالدا سونىڭ ءبارىن كورسەتۋگە مۇمكىندىك بار», — دەيدى رەجيسسەر الديار بايراكيموۆ.
ايتا كەتەيىك, ارنايى وسى سەريال ءۇشىن اۆتورلار ۇلتتىق ستيلدەگى كوشە تاعامدارىن ويلاپ تاپتى, ياعني ءداستۇرلى اس پەن فاستفۋدتى بىرىكتىرگەن. جوبانىڭ ستسەناريسى رابيعا ءابىلپاتتا قازاقستاندا مۇنداي جوبانىڭ بۇرىن-سوڭدى بولماعانىن اتاپ ءوتتى.
ء«بىز قازاق تاعامى تۋرالى سەريال جاساعىمىز كەلدى. سول ءۇشىن دە جاڭا تاعام تۇرلەرىن ويلاپ تاپتىق. مىسالى, ءبىزدىڭ ءداستۇرلى باۋىرساققا نەگىزدەلگەن «شاۋرساك» دەگەن جاڭا تاعام پايدا بولدى. بۇل يدەيانى ءبىز ءبىر جىل بۇرىن قولعا الدىق. بىزگە اسحانا, اسپازدىق تاقىرىبى ۇنادى, سودان وسىنداي حيكايا جاساۋعا بەل بۋدىق», — دەدى رابيعا.
باستى رولدەردى ديدار تولەگەن, شۇعىلا ەشەنوۆا, عاني قۇلجانوۆ, مادينا جۇماباەۆا, رۋستام سايدحودجاەۆ, ايجان پەرنەبەكوۆا, ەرنۇر جەكسەنباەۆ جانە باسقا دا اكتەرلەر سومدايدى.
اسپازداردىڭ ءرولىن ويناعان اكتەرلەر ارنايى اسپازدىق كۋرستان وتكەن. ديدار تولەگەننىڭ ايتۋىنشا, جوباعا دەيىن ول تاماق دايىنداۋدى مۇلدە بىلمەگەن, ال وقۋدان كەيىن اس ۇيدە تاجىريبە جاساپ ۇيرەنە باستاعان.
«العاش ۇيرەنگەن تاعامىم — ستەيك. بىراق مەن ءۇشىن ەڭ قىزىعى — سوۋستار بولدى: شيە سوۋسى, بالىققا ارنالعان ءتۇرلى سوۋستار. سولاردى دايىنداۋ ماعان ەرەكشە ۇنادى. سەريالدى كورگەن كورەرمەن وتباسىعا دەگەن ماحابباتتى, تاعامعا دەگەن سۇيىسپەنشىلىكتى تۇسىنەدى. سونداي-اق ماقساتىڭ بولسا, وعان جەتۋ ءۇشىن سوڭىنا دەيىن كۇرەسۋ كەرەكتىگىن سەزىنەدى. ءبىز كورەرمەنگە ءدال وسى ويدى جەتكىزگىمىز كەلەدى», — دەيدى اكتەر.
كينوپويسك قازاق كورەرمەنىنە مەنتاليتەتى جاقىن وقيعالاردى قولداپ, جەرگىلىكتى كونتەنتتى دامىتۋدى جالعاستىرىپ كەلەدى. «Streetحانا» سەريالىنىڭ پرەمەراسى كينوپويسك پلاتفورماسىندا ەكسكليۋزيۆتى تۇردە وتەدى. ايتا كەتەيىك, بۇل — كينوپويسكتىڭ قازاقستانداعى ەكىنشى جوباسى. بۇعان دەيىن العاشقى سەريالى — كريمينالدىق كومەديا جانرىنداعى «پود كونترولەم» ءتۇسىرىلىمى اياقتالعان بولاتىن.