الماتى قالاسىنىڭ اكىمدىگى ەلىمىزدەگى جەتەكشى قۇرىلىس كومپانيالارىنىڭ ءبىرى – BI Group كومپانياسىمەن بىرلەسىپ, ەسەنتاي وزەنىنىڭ بويىن اباتتاندىرۋ بويىنشا اۋقىمدى جوبانى قولعا الدى. بۇل باستاما بيزنەستىڭ الەۋمەتتىك جاۋاپكەرشىلىگى اياسىندا جۇزەگە اسادى. كەلىسىمگە سايكەس, BI Group كومپانياسى ءوز قارجىسى ەسەبىنەن 11 ميلليارد تەڭگەدەن استام ينۆەستيتسيا سالىپ, ءال-فارابي داڭعىلىنان رىسقۇلوۆ داڭعىلىنا دەيىنگى 7,2 شاقىرىمدىق اۋماقتى تولىقتاي جاڭعىرتادى, دەپ حابارلايدى Egemen.kz.
قالا اكىمدىگىنىڭ حابارلاۋىنشا, جوبانىڭ نەگىزگى ماقساتى – الماتىنىڭ جوعارعى جانە تومەنگى بولىكتەرىن بايلانىستىراتىن, تۇرعىندار مەن قالا قوناقتارى ءۇشىن قولايلى ءارى تارتىمدى زاماناۋي قوعامدىق كەڭىستىك قالىپتاستىرۋ.
«قۇرىلىس جانە اباتتاندىرۋ جۇمىستارى بىرنەشە كەزەڭمەن جۇرگىزىلەدى. العاشقى كەزەڭدە ءال-فارابي داڭعىلىنان اباي داڭعىلىنا دەيىنگى ۋچاسكە قامتىلىپ, اباتتاندىرۋ جۇمىستارى بيىل اياقتالادى دەپ جوسپارلانعان», دەلىنگەن حابارلامادا.
سونىمەن قاتار ەسەنتاي وزەنىنىڭ جاعالاۋى بويىندا جاياۋ جۇرگىنشىلەر مەن ۆەلوسيپەد جولدارى, جاڭا ساياباقتار, دەمالىس ورىندارى, جاسىل ايماقتار, كوگالداندىرۋ ەلەمەنتتەرى, ورىندىقتار, جارىقتاندىرۋ, قالالىق ينفراقۇرىلىم جانە جاستار مەن ستۋدەنتتەرگە ارنالعان ارنايى ايماقتار سالىنادى. سونداي-اق تىنىشتىقتى قالايتىن تۇرعىندارعا ارنالعان رەلاكساتسيا كەڭىستىكتەرى, مادەني جانە بەلسەندى دەمالىس ايماقتارى دا ەسكەرىلەدى.
قالا كەڭىستىگىن دامىتۋ سالاسىنداعى مامانداردىڭ پىكىرىنشە, ەسەنتاي وزەنى بويىنداعى ايماقتىڭ الەۋەتى زور. بۇل ارنا جاسىل بەلدەۋلەردى, تۇرعىن ءۇي كەشەندەرىن, ستۋدەنتتىك كامپۋستاردى كەسىپ وتەدى جانە مادەني-سپورتتىق نىساندارعا جاقىن ورنالاسقان. بوس جاتقان اۋماقتار جاڭا سكۆەرلەر, ەكوپاركتەر جانە تۋريستىك ايماقتار قۇرۋعا مۇمكىندىك بەرەدى.