مەملەكەت باسشىسى مەديتسينا قىزمەتكەرلەرىنە شابۋىل جاساپ, كۇش قولدانىپ جانە قاتىگەزدىك تانىتقان ارەكەتتەرگە قاتىستى جازانى قاتاڭداتۋ ماقساتىندا ۇلتتىق زاڭناماعا وزگەرىستەر ەنگىزۋ تۋرالى پارلامەنت دەپۋتاتتارىنىڭ, دەنساۋلىق ساقتاۋ سالاسى وكىلدەرىنىڭ جانە بەلسەندى ازاماتتاردىڭ ۇسىنىسىن قولدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«دارىگەرلەردىڭ دەنساۋلىعىنا نۇقسان كەلتىرىپ, ومىرىنە قاۋىپ توندىرەتىن مۇنداي كەلەڭسىزدىكتەرگە «زاڭ جانە ءتارتىپ» قاعيداتىنا سايكەس قۇقىقتىق تۇرعىدا باتىل تۇردە توسقاۋىل قويىلۋى كەرەك», دەلىنگەن حابارلامادا. پرەزيدەنت ۇكىمەتكە ءتيىستى زاڭنامالىق تۇزەتۋلەر ازىرلەۋدى تاپسىردى. بۇل باستاما پارلامەنتتە ازاماتتىق قوعام وكىلدەرىمەن بىرگە تالقىلانادى.