شىعىس قازاقستاندا كوكتەمگە ازىرلىك شارالارى جۇرگىزىلۋدە. وزگە وڭىرلەرگە قاراعاندا التايدىڭ القىمىنداعى الاپتا قار قالىڭ تۇسەدى. ەلىمىزدەگى سۋ رەسۋرستارىنىڭ باسىم بولىگى دە شىعىس قازاقستان وبلىسىنىڭ اۋماعىندا. بۇگىندە ءوڭىردىڭ 8 ايماعىندا قار ىلعالدىلىعىنىڭ كوتەرىلگەنى بايقالدى. ونىڭ ۇستىنە سوڭعى كۇندەرى وبلىس اۋماعىندا قار قاتتى ەرىپ, جاڭبىر جاۋدى, كوكتايعاق تا, بۇرقاسىن دا, قاتتى جەل دە تۇردى. سوندىقتان, ءوڭىر تۇرعىندارىنىڭ الاڭداۋشىلىعىن تۇسىنۋگە بولادى.
جۋىقتا وبلىس اۋماعىندا 4 شاقىرىمدىق تاسقىنعا قارسى بوگەت سالىندى جانە بۇرىننان قولدانىستا كەلە جاتقان بوگەتتەردىڭ 1,2 شاقىرىمى جوندەۋدەن ءوتىپ, بەرىكتىگى كۇشەيتىلدى. بۇل جونىندە وبلىستىق توتەنشە جاعداي دەپارتامەنتى باسشىسىنىڭ ورىنباسارى مىندەتىن اتقارۋشى سۇلتان احمەتوۆ پەن توتەنشە جاعدايدىڭ الدىن الۋ ءبولىمىنىڭ باسشىسى ەۆگەني شاتۋرنىي مالىمدەدى. ءتوتەنشە جاعداي دەپارتامەنتىنىڭ وكىلدەرى سوڭعى كۇندەرى كۇننىڭ كۇرت جىلىنۋىنا بايلانىستى حالىقتى الاڭداتقان ساۋالدارعا جاۋاپ بەردى.
– وبلىس اكىمىنىڭ قاۋلىسىمەن «2015 جىلدىڭ كوكتەم ماۋسىمىنداعى تاسقىنعا قارسى ءىس-شارالار جوسپارى» بەكىتىلدى. تاسقىن كەزەڭىندە سۋ دەڭگەيى كوتەرىلۋىنىڭ الدىن-الۋ جانە جەدەل جويۋ ءۇشىن شىعىس قازاقستان وبلىسى توتەنشە جاعدايلار دەپارتامەنتىنىڭ 844 ادامدىق جەكە قۇرامنان تۇراتىن توبى, 149 ارنايى تەحنيكا, 22 ءجۇزۋ جابدىعى, 9 موتوتومپ ازىرلەندى. جولسىز جەرلەردە ىزدەۋ-قۇتقارۋ جۇمىستارىن جۇرگىزۋ ماقساتىندا 7 شىنجىر تاباندى اۋىر تەحنيكالارىمىز بار. توتەنشە جاعداي ورىن العان اۋماقتى بارلاۋ جانە زارداپ شەگۋشىلەردى قۇتقارۋعا ارنالعان «شىعىس قازاقستان وبلىسى اۋە بولىمشەسى» كمقك 7 تىكۇشاعى دايىندالدى, – دەدى س.احمەتوۆ.
سونداي-اق حالىق, كوممۋنيكاتسيا, شارۋاشىلىق نىساندارىن قار كوشكىنىنەن قورعاۋدى قامتاماسىز ەتۋ ماقساتىندا «قازسەلدەنقورعاۋ» مەكەمەسى كوشكىن جۇرەتىن قاۋىپتى ايماقتارعا باقىلاۋ جۇرگىزۋدە. 2014 جىلدىڭ قاراشاسىنان 2015 جىلدىڭ اقپان ايىنا دەيىن قار كوشكىنى قۇلاۋىنىڭ الدىن-الۋعا ارنالعان 14 شارا وتكىزىلدى.
ە.شاتۋرنىيدىڭ ايتۋىنشا, سوڭعى جىلدارى بۇل سالادا قاۋىپسىزدىك شارالارى كۇشەيتىلىپ, كەشەندى جۇمىستار جۇرگىزىلدى. دەگەنمەن, «اپات ايتىپ كەلمەيدى». تابيعاتتىڭ رايىنا نوقتا كيگىزە المايسىز. توتەنشە وقيعا ورىن العان جاعدايدا زارداپ شەككەندەردى ۋاقىتشا ورنالاستىرۋ جانە ولاردى ازىق-ت ۇلىك, كيىم-كەشەكپەن قامتۋعا قاجەتتى ماتەريالدىق-تەحنيكالىق رەسۋرستار, قۇرال-جابدىقتاردىڭ قوسىمشا قورى قۇرىلدى. دەپارتامەنتتىڭ جالپى سىيىمدىلىعى 600 ادامعا جەتەتىن شاتىرلى لاگەرى بار.
بىلتىر جازعى-كۇزگى ماۋسىمداردا وبلىستاعى قالالار مەن اۋدانداردا ايتارلىقتاي كەشەندى شارالار ءوتتى. سۋ دەڭگەيىنىڭ كوتەرىلۋى مۇمكىن وزەندەردىڭ تابانى تازالانىپ, تەرەڭدەتىلىپ, جاعالاۋى كەڭەيتىلدى. ارىق-كانالدار جۇيەسى تازالاندى. جانار-جاعارماي, قاپ سياقتى قاجەت دۇنيەلەردىڭ قوسىمشا قورى ازىرلەندى. سۋ توسپالارىنىڭ احۋالى قاتاڭ قاداعالانىپ كەلەدى.
دۋمان اناش,
«ەگەمەن قازاقستان».
وسكەمەن.