قر مادەنيەت جانە اقپارات ءمينيسترى ايدا بالاەۆا «ايقىن» گازەتىنە بەرگەن سۇحباتىندا مادەنيەت سالاسىنداعى تسيفرلاندىرۋدىڭ ماڭىزىنا توقتالدى. ونىڭ ايتۋىنشا, تسيفرلاندىرۋ – ەسەپ جۇيەسىن جاڭارتۋمەن شەكتەلمەيدى, بۇل – ۇلتتىق مۇرانى ساقتاپ, ونى الەمگە تانىتۋدىڭ, كەلەشەك ۇرپاققا جەتكىزۋدىڭ زاماناۋي ءتاسىلى, دەپ حابارلايدى Egemen.kz.
مينيستر مادەنيەت پەن ونەردىڭ شەكاراسىز قولجەتىمدىلىگىنە قول جەتكىزۋ ءۇشىن تسيفرلىق مۇمكىندىكتەردى پايدالانۋ قاجەت ەكەنىن ايتتى. ول سوڭعى جىلدارى مادەني نىسانداردى تسيفرلىق فورماتقا كوشىرۋ, اۆتوماتتاندىرىلعان جۇيەلەردى ەنگىزۋ باعىتىندا ناقتى جۇمىستار قولعا الىنعانىن جەتكىزدى.
اتاپ ايتقاندا, بيىل ىسكە قوسىلاتىن E-museum ۆەب-پورتالى – قازاقستان مۋزەيلەرىنىڭ بىرىڭعاي ۆيرتۋالدى الاڭى بولماق. بۇل پلاتفورما ارقىلى قولدانۋشىلار ەلىمىزدىڭ مادەني مۇراسىن 3D ۇلگىدە, ينتەراكتيۆتى فورماتتا كورۋگە مۇمكىندىك الادى. جوبا اياسىندا مەملەكەتتىك مۋزەي قورى ەلەكتروندى فورماتتا ۇزدىكسىز جاڭارتىلىپ وتىرادى.
سونداي-اق «ايشا ءبيبى كەسەنەسىندە» ەلەكتروندىق بيلەت جۇيەسىن ەنگىزۋ جۇمىستارى باستالعان. بۇل جۇيە بەينەكامەرا, تۋرنيكەتپەن جابدىقتالىپ, face ID نەمەسە ID-كارتا ارقىلى كىرۋ مۇمكىندىگىن ۇسىنادى. وسىنداي جۇيەلەر «ازىرەت سۇلتان», «وتىرار» مۋزەي-قورىعى, «قاراحان كەسەنەسى» سىندى تاريحي نىسانداردا دا ەنگىزىلەدى.
«مادەنيەت تسيفرلانباسا – ول تۇيىقتالادى. قازىرگى ۇرپاق اقپاراتتى ۆيزۋالدى, ينتەراكتيۆتى تۇردە قابىلدايدى. دەمەك, ەگەر ءبىز جاستاردى ۇلتتىق مادەنيەتكە تارتقىمىز كەلسە, ونى سولاردىڭ تىلىمەن, تسيفرلىق ورتادا سويلەتۋىمىز كەرەك. بۇعان قوسا, تسيفرلاندىرۋ – مۇرانى ساقتاۋ كەپىلى. قاعاز قۇجات پەن قولجازبا توزادى, بىراق تسيفرلىق نۇسقا ماڭگى ساقتالادى ءارى الەمنىڭ كەز كەلگەن جەرىنەن قولجەتىمدى بولادى», – دەدى ايدا بالاەۆا.