ايدا بالاەۆا «قازاقفيلمگە» قاتىستى سىنعا جاۋاپ بەردى

باسشىلىقتا كىم بولۋى كەرەك؟

ەڭ الدىمەن ايدا بالاەۆا باسشىلىقتى تاڭداۋ ماسەلەسىندە كينو سالاسىنىڭ كاسىبي وكىلدەرىمەن, سونىڭ ىشىندە ءاسانالى اشىموۆپەن كەڭەسكەنىن ايتتى.

«سول كەزدە ءبىز «قازاقفيلمدى» اكتەر دە, رەجيسسەر دە ەمەس, كاسىبي مەنەدجەر باسقارۋى كەرەك دەگەن ورتاق ويعا كەلدىك. راسىندا, بىزگە ناقتى ناتيجە قاجەت.سوندىقتان قازىرگى باسشىنى قازاق ءتىلىن جەتىك بىلمەيدى دەپ كىنالاپ, اتقارىلىپ جاتقان جۇمىستاردى جوققا شىعارۋ ورىنسىز دەپ سانايمىن», دەدى مينيستر.

ايدا عالىمقىزىنىڭ ايتۋىنشا, ستۋديانىڭ باستى باعىتتارىنىڭ ءبىرى –  جەكە ينۆەستيتسيا تارتۋ. سوڭعى 15 جىلدا العاش رەت دەمەۋشىلەردىڭ قولداۋىمەن ءىشىنارا جوندەۋ جۇمىستارى باستالعان. بۇعان قوسا, Kinopark & Kinoplexx كينوتەاترلار جەلىسىنىڭ قارجىلاندىرۋىمەن ستۋديا اۋماعىندا جازعى كينوتەاتر سالۋ جانە 1 مىڭ شارشى مەترلىك عيماراتتى جوندەۋ جوسپارلانىپ وتىر.

ء«بىز ءار ازاماتتىڭ پىكىرىن قۇرمەتتەيمىز. بىراق ءبىزدىڭ ۇستانىمىمىز – «سىن شىن بولسىن, شىن سىن بولسىن». كەيبىر ازاماتتار ايتىپ جۇرگەندەي, ەشكىم «قازاقفيلمنىڭ» جەرىن ساتىپ جىبەرمەك ەمەس. ءبىز وتاندىق فيلمدەردىڭ ءار جەتىستىگىنە شىن قۋانىپ, ونى بۇقارالىق اقپارات قۇرالدارىندا تۇراقتى تۇردە ناسيحاتتاپ كەلەمىز», دەدى مينيستر.

ءمينيستردىڭ پىكىرىنشە, نەگىزسىز ايىپتاۋ, دالەلسىز داۋ, سەبەپسىز كىنا تاعۋ كينوستۋديانى العا باستىرمايدى. كەرىسىنشە, ول بارشا شىعارماشىلىق قاۋىمدى بىرىگىپ ەڭبەك ەتۋگە شاقىردى. سەبەبى كينو – ۇلتتىڭ رۋحاني كودىنىڭ كوركەم بەينەسى, ال ونى دامىتۋ – تەك مەملەكەتكە ەمەس, بۇكىل شىعارماشىلىق ورتاعا ورتاق مىندەت.

ء«بىز العاش تالداۋ جۇرگىزگەن كەزدە كينوگەرلەردىڭ باسىم بولىگى ساپالى ءونىم شىعارۋعا جانە ونى ناسيحاتتاۋعا مۇددەلى ەمەس ەكەنىن ايتقانىمىزدا ءبىراز ادام رەنجىدى. كەي رەجيسسەرلەر ءتىپتى اشىق قارسىلىق تانىتتى», دەدى مينيستر.

 داۋ ەمەس, دامۋ الاڭى 

سونىمەن قاتارمادەنيەت جانە اقپارات ءمينيسترى ۇلتتىق كينونى قولداۋعا ارنالعان پيتچينگ جۇيەسىنە قاتىستى تۋىنداعان پىكىرلەرگە  ءوز ۇستانىمىن ءبىلدىردى. ءمينيستردىڭ ايتۋىنشا, ەلىمىزدە پيتچينگكە قاتىسۋعا نيەتتى شىعارماشىل جاستاردىڭ قاتارى كوبەيىپ كەلە جاتقانى – ءۇمىت پەن سەنىمنىڭ بەلگىسى.

«الايدا بايقاۋدان وتپەگەن جاعدايدا نارازىلىق تانىتىپ, ىرىكتەۋ ۇدەرىسىنىڭ ادىلدىگىنە كۇمان كەلتىرەتىندەر دە بار. ءتىپتى, كەيبىرەۋلەر «ميتينگكە شىعامىز» دەگەنگە دەيىن بارادى. بۇل – وكىنىشتى جاعداي. ويتكەنى مادەنيەت داۋ-دامايدىڭ ەمەس, تىڭ يدەيا مەن اۋىزبىرلىكتىڭ الاڭى بولۋى كەرەك», دەدى ايدا بالاەۆا.

مينيستر پيتچينگ ۇدەرىسىنىڭ اشىقتىعىن ارتتىرۋ ماقساتىندا جۇيەگە بىرقاتار وزگەرىستەر ەنگىزىلگەنىن ايتتى. اتاپ ايتقاندا, ساراپشىلار قۇرامى جاڭارتىلىپ, ىرىكتەۋ كريتەريلەرى ناقتىلانعان.

ء«بىز مادەني باسەكەلەستىكتى ساياسي الاڭ­عا اينالدىرماۋىمىز كەرەك. شىعارماشى­لىق – سەنىم مەن جاۋاپكەرشىلىككە نەگىزدە­لۋى كەرەك. ەگەر ءبىز حالىقارالىق دەڭگەيدە مويىندالاتىن كينو جاساعىمىز كەلسە, ەڭ الدىمەن, ءوز ىشىمىزدە ادىلەتتىلىككە, تارتىپكە جانە ورتاق جاۋاپكەرشىلىككە ۇيرەنۋىمىز كەرەك. جەڭىلىستى دە, جەڭىستى دە مادەنيەتپەن قابىلداۋ – شىعارماشىلىق ادامعا ءتان قاسيەت»,  دەدى مينيستر.

بالاەۆانىڭ ايتۋىنشا, مەملەكەت باسشىسىنىڭ تاپسىرماسىنا سايكەس, 2030 جىلعا دەيىن وتاندىق فيلمدەردىڭ كينوقۇرىلىمداعى ۇلەسىن 35 پايىزعا جەتكىزۋ كوزدەلىپ وتىر. 2024 جىلى مەملەكەتتىك قارجىلاندىرۋ اياسىندا 16 ۇلتتىق فيلم كورەرمەنگە جول تارتسا, بيىل 6 تۋىندى جارىق كورىپ, جىل سوڭىنا دەيىن تاعى 10-عا جۋىق كارتينا پروكاتقا شىعارىلادى.

سونداي-اق مينيستر ەل اۋماعىندا شەتەلدىك جانە وتاندىق فيلمدەرگە پروكاتتاۋ كۋالىگىن بەرۋ ءراسىمىن جەتىلدىرۋ ماقساتىندا زاڭنامانى كۇشەيتۋ باعىتىندا جۇمىستار جۇرگىزىلىپ جاتقانىن دا اتاپ ءوتتى.

«بىزگە جاڭا تولقىن, جاڭا مازمۇن قاجەت. ول ءۇشىن شىنايى تالانتتى جاستارعا جول اشۋ – ءبىزدىڭ مىندەتىمىز. اعا بۋىن رەنجىمەسىن, بىراق بۇگىنگى جاستار از قاراجاتپەن ۇلكەن تاقىرىپتاردى يگەرىپ, جاڭا وزگەرىستەرگە جول اشىپ كەلەدى. بۇل – ۇلتتىڭ جاڭا كوركەمدىك ايناسى. ولاردىڭ ەڭبەگى بەدەلدى حالىقارالىق كينوفەستيۆالدەردە جوعارى باعالانىپ ءجۇر. دەمەك, بىزدە الەۋەت بار. ەندىگى ماقسات – وسى الەۋەتتى جۇيەلى تۇردە قولداپ, وعان جول اشۋ», دەدى ايدا بالاەۆا.

ءمينيستردىڭ ايتۋىنشا, كاسىبي مادەنيەتتى قالىپتاستىرۋ ارقىلى عانا وتاندىق كينويندۋستريا حالىقارالىق ارەنادا ءوز ورنىن تابا الادى.