ەلباسى نۇرسۇلتان نازارباەۆ ۋكراينا پرەزيدەنتى پەتر پوروشەنكومەن تەلەفون ارقىلى سويلەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
مەملەكەت باسشىلارى ۋكراينا داعدارىسىن رەتتەۋگە بايلانىستى وتكەن مينسك كەزدەسۋىنىڭ قورىتىندىلارىن تالقىلادى.
ۋكراينانىڭ وڭتۇستىك-شىعىسىنداعى قاقتىعىستى بەيبىت جولمەن رەتتەۋ ۇدەرىسىن ىلگەرىلەتۋگە قوسقان جەكە قوماقتى ۇلەسى ءۇشىن نۇرسۇلتان نازارباەۆقا العىس ايتقان ۋكراينا پرەزيدەنتى وسى باعىتتا ودان ءارى قاراي كۇش-جىگەر جۇمساي بەرۋىن ءوتىندى.
پ.پوروشەنكو ۋكراينا جاعى وق اتۋدى بەلگىلەنگەن ۋاقىتتا توقتاتاتىنىنا سەندىرە وتىرىپ, ەكىنشى جاقتىڭ دا وسىلاي ارەكەت ەتۋى قاجەت ەكەندىگىنە نازار اۋداردى.
قازاقستان پرەزيدەنتى قاقتىعىسىپ جاتقان تاراپتار مينسك كەلىسىمىندە قابىلدانعان كەشەندى شارالاردىڭ مۇلتىكسىز ورىندالۋىن قامتاماسىز ەتكەنى ماڭىزدى ەكەنىن ايتتى. بۇكىل الەم وسىنى كۇتىپ وتىر.
تەلەفون ارقىلى سويلەسۋگە ۋكراينا جاعى باستاماشى بولدى.