استانادا جاستار مەن جاسوسپىرىمدەر اراسىندا اۋىر اتلەتيكادان وتكەن ازيا چەمپيوناتى ەلىمىز قۇراماسىنىڭ ايقىن جەڭىسىمەن اياقتالدى. جارىستا 27 مەملەكەتتەن كەلگەن 450-دەن اسا زىلتەمىرشى كۇش سىناستى.
بارلىق جاتتىعۋدى ەسەپكە الار بولساق, ەلىمىزدىڭ جاستار قۇراماسى 12 التىن, 4 كۇمىس, 7 قولا مەدالدى ولجالادى. ۆەتنام مەن ءۇندىستاننىڭ ناتيجەلەرى بىردەي بولدى. ولار 8 التىن, 6 كۇمىس, 2 قولانى قورجىنعا سالدى. وڭتۇستىك كورەيا قۇراماسى 7 التىن, 6 كۇمىس, 4 قولانى ەنشىلەدى. جاسوسپىرىمدەر جارىسىندا جەرلەستەرىمىز 9 التىن, 8 كۇمىس, 10 قولانى قانجىعاعا بايلادى. تايلاند 6 التىن, 7 كۇمىس, 2 قولانى يەلەندى. قىتايدىڭ قورجىنىندا – 6 التىن, 5 كۇمىس, 1 قولا. ازيانىڭ ەڭ ۇزدىك كوماندالارى اراسىنان ەلىمىزدىڭ زىلتەمىرشىلەرىنىڭ وزىپ شىعۋى وتاندىق اۋىر اتلەتيكانىڭ الەۋەتى وتە جوعارى ەكەنىن بايقاتادى.
اسىرەسە 71 كگ سالماق دارەجەسىندە ونەر كورسەتكەن 17 جاستاعى ءاليحان اسكەربايدىڭ شەبەرلىگى بارشانى ءتانتى ەتتى. جەتىسۋ وبلىسى, سارقان اۋدانى, قارابوگەت اۋىلىنىڭ تۋماسى جارىستىڭ ءۇش جاتتىعۋى بويىنشا دا الدىنا جان سالماي, باس جۇلدەنى ولجالادى. ءاليحان ازيانىڭ ءۇش, الەمنىڭ ءۇش رەكوردىن جاڭارتتى. قوسسايىستىڭ قورىتىندىسىندا اسا دارىندى جاس ورەن 310 (141+169) كيلوگراممدىق زىلتەمىردى ەڭسەردى. بۇل – ەرەكشە اتاپ وتەرلىك جايت. قازىردە بىلىكتى باپكەر سەرگەي سەدوۆتىڭ قول استىندا جاتتىعىپ جۇرگەن ءا.اسكەربايدىڭ بولاشاعىنا ماماندار زور ۇمىتپەن قاراپ وتىر. سەبەبى بىلتىرعى ازيا چەمپيوناتىندا دا قانداسىمىز التىن تۇعىرعا كوتەرىلگەن ەدى. ول كەزدە ءاليحان 64 كگ سالماقتا باق سىنادى.
استانا تورىندە ءا.اسكەربايدان بولەك, كسەنيا پروزوروۆا (58 كگ), نۇرجان جۇماباي (79 كگ), ەدىگە ەمبەردى (79 كگ), كيرا دانيلوۆا (69 كگ), ەراسىل ساۋلەبەكوۆ (88 كگ), دەنيس پولۋبويارينوۆ (94 كگ), باسقا دا زىلتەمىرشىلەر تاماشا ونەر كورسەتىپ, كوپشىلىكتىڭ قوشەمەتىنە بولەندى.