بيىلعى جىلى ۇلىتاۋ وبلىسىنداعى جايرەم كەنتىندە 13 كوشەنىڭ اۆتوكولىك جولدارىنا ورتاشا جوندەۋ جۇمىستارى جۇرگىزىلدى, دەپ جازادى Egemen.kz.
«جول اكتيۆتەرى ۇلتتىق ساپا ورتالىعى» رمك ۇلىتاۋ وبلىستىق فيليالىنىڭ ماماندارى وسى جولداردىڭ ساپاسىن تەكسەرىپ, اسفالت بەتوننان سىناما الۋ جۇمىستارىن جۇرگىزدى.
سىناما الۋ جۇمىسىمەن قاتار الداعى ۋاقىتقا جوسپارلانعان جولداردىڭ كولەمدەرى دە ولشەندى.
قازاقستان رەسپۋبليكاسىنىڭ كولىك مينيسترلىگى اۆتوموبيل جولدارى كوميتەتىنىڭ «جول اكتيۆتەرى ساپاسىنىڭ ۇلتتىق ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى مەن «جايرەم كەنتى اكىمىنىڭ اپپاراتى» مەملەكەتتىك مەكەمەسى اراسىندا كەلىسىمشارت نەگىزىندە 13 كوشەدە اسفالت جابىندىسىنان سىناما الىندى. سونىڭ ىشىندە اساتوۆ, سەرپىن كوشەلەرى تەكسەرىستەن وتپەي قالعان. وسى اتالعان كوشەلەردەن قايتادان سىناما الىندى. ناتيجەسى ون جۇمىس كۇنى ىشىندە دايىن بولادى. ەگەر اتالعان كوشەنىڭ جولدارى تاعى دا تالاپقا ساي بولماسا, اسفالت تولىقتاي ءسۇرىلىپ تاستالىپ, قايتادان سالىنادى.
ء«بىز جايرەم كەنتى جولدارىنىڭ ورتاشا جوندەۋ جۇمىستارىن تەكسەردىك. جول جوندەۋ جۇمىستارى باستالعاننان باستاپ ءبىزدىڭ فيليال جايرەمگە جەتى رەت كەلىپ, سىناق زەرتحاناسىنا قىرىق سەگىز سىناما الدى. ناتيجەسىندە ىرىكتەلىنىپ الىنعان سىنامانىڭ ۇشەۋى نورماتيۆتىك تالاپتارعا ساي بولماعاندىقتان قايتادان سىناما الۋعا كەلدىك», دەيدى جول اكتيۆتەرى ساپاسىنىڭ ۇلتتىق ورتالىعى ۇلىتاۋ وبلىسى بويىنشا فيليالىنىن ينجەنەرى ورازالى ورازباەۆ.
سىنامالاردى كەز كەلگەن جەردەن الۋعا بولمايدى. ءوزىنىڭ بەلگىلەنگەن جەرلەرى بار. سىناما الۋ كەزىندە مىندەتتى تۇردە مەردىگەر كومپانيانىڭ ماماندارى جانە تەحنيكالىق قاداعالاۋ ماماندارى قاتىسادى. وسى جولى سىناما الۋعا جولدى جاساعان مەردىگەر «ارقا قۇرىلىس - 2009» جشس وكىلدەرى, كەنت اكىمى جانە دەپۋتاتتار دا باردى.
ۇلىتاۋ وبلىسى