وپەك ۇيىمىنىڭ باس حاتشىسى حايتام ءال-گايس 2025 جىلعى 2-4 قازان ارالىعىندا وتەتىن Kazakhstan Energy Week – 2025 ەۋرازيالىق فورۋمىنا قاتىسۋ ءۇشىن استاناعا كەلەدى. بۇل تۋرالى فورۋمنىڭ ۇيىمداستىرۋشىلارى رەسمي تۇردە حابارلادى, دەپ جازادى Egemen.kz.
«مەن وسى بەدەلدى ءىس-شاراعا ۇلەس قوسىپ, پلەنارلىق سەسسياعا قاتىساتىنىما قۋانىشتىمىن», دەدى حايتام ءال-گايس.
ەنەرگەتيكا اپتالىعى اياسىندا الەمدىك كوشباسشىلار, حالىقارالىق ۇيىم وكىلدەرى جانە جاھاندىق, وڭىرلىك ەنەرگەتيكالىق كومپانيالاردىڭ جەتەكشىلەرى باس قوسىپ, سالانىڭ وزەكتى ماسەلەلەرىن, جاڭا ترەندتەرىن جانە دامۋ پەرسپەكتيۆالارىن تالقىلايدى.
وپەك-ءتىڭ قازىرگى باس حاتشىسى بۇل قىزمەتكە 2022 جىلدىڭ 1 تامىزىندا تاعايىندالعان. ول حالىقارالىق مۇناي-گاز سالاسىندا 30 جىلدان استام تاجىريبەسى بار مامان. بۇعان دەيىن كۋۆەيت, بەيجىڭ جانە لوندوندا مۇناي كومپانيالارىندا جەتەكشى قىزمەتتەر اتقارعان.
2018-2019 جىلدارى ءال-گايس وپەك-كە مۇشە ەمەس مۇناي ءوندىرۋشى ەلدەرمەن ىنتىماقتاستىق حارتياسىن ازىرلەۋگە جانە وعان قول قويۋعا تىكەلەي قاتىسقان كۋۆەيت دەلەگاتسياسىن باسقاردى.
2021 جىلى ول كۋۆەيت ۇلتتىق مۇناي كومپانياسىنىڭ (KPC) حالىقارالىق ماركەتينگ جونىندەگى باسقارۋشى ديرەكتورىنىڭ ورىنباسارى قىزمەتىنە تاعايىندالىپ, جاھاندىق نارىقتارداعى دامۋ بولجامدارى مەن كومپانيانىڭ ۇزاقمەرزىمدى ستراتەگياسىن جاساۋمەن اينالىستى.
ايتا كەتەيىك, بۇعان دەيىن ەنەرگەتيكا ءمينيسترى ەرلان اقكەنجەنوۆ مارتەبەلى حايتام ءال-گايسپەن كەزدەسىپ, قازاقستاننىڭ وپەك الدىنداعى مىندەتتەمەلەرىنە ادالدىق تانىتاتىنىن مالىمدەگەن بولاتىن.