ەلىمىز وسى جىلدىڭ 4 ايىندا 6 پايىزدىق ءوسىم كورسەتتى. بۇل – كەيىنگى 12 جىلداعى ەڭ جوعارعى كورسەتكىش. شىمكەنت قالاسىنىڭ ۇلەسى قانداي؟ مەگاپوليستە قانداي يننوۆاتسيالىق جوبالار بار؟ شىمكەنت قالالىق ءماسليحاتىنىڭ دەپۋتاتى, ساراپشى تالعات ىسقاقوۆتىڭ ايتۋىنشا, ءۇشىنشى مەگاپوليس كەيىنگى جىلدارى جوعارى قارقىنمەن دامىپ كەلەدى, اسىرەسە قۇرىلىس سالاسىندا ىلگەرىلەۋ باسىم.
«كوپقاباتتى ۇيلەر قۇرىلىسىنىڭ قارقىنى جوعارى. شىمسيتي, تۇران, بوزارىق جاڭا شاعىن اۋداندارى پايدا بولدى. شاھاردا يندۋستريالدى ايماق پەن كولىك-لوگيستيكالىق ورتالىقتاردىڭ كوبەيۋى ينفراقۇرىلىمدىق مۇمكىندىكتەردى دە كۇشەيتتى. جول سالۋ, گازداندىرۋ, اۋىزسۋ تارتۋ, باسقا دا ينجەنەرلىك-كوممۋنيكاتسيالىق جۇيەلەر شەتكى ەلدى مەكەندەرگە دەيىن اپارىلدى», دەيدى ساراپشى.
سونداي-اق ارنايى ەكونوميكالىق ايماق سان الۋان كاسىپتىڭ دامۋىنا سۇبەلى ۇلەس قوسىپ وتىر.
«شىمكەنتتە وندىرىستىك الاڭداردىڭ دامۋ قارقىنى وتە جوعارى. ماسەلەن, كىلەم توقۋ فابريكاسى «وڭتۇستىك» ارنايى ەكونوميكالىق ايماعىندا ورنالاسقان. «وڭتۇستىك» اەا جەڭىل ونەركاسىپ سالاسىنا ارناپ قۇرىلعان. ودان بولەك, «تاسساي», «ورداباسى», «جۇلدىز» اتتى باسقا دا يندۋستريالدى ايماقتار بار. ول جەردە ساپالى, جاقسى ونىمدەر شىعارىلادى. شىنى, اليۋمينيدەن جاسالاتىن ىدىستار, كەراموگرانيت بۇيىمدار, جيھازدار, ءدارى-دارمەك پەن مەديتسينالىق قۇرىلعىلار وندىرىلەدى. جەڭىل ونەركاسىپتە كىلەممەن بىرگە ش ۇلىق, سۇلگى, توسەكتىك ورىن جامىلعىلارى توقىلادى. ونەركاسىپتەگى نەگىزگى ماقسات – ءونىمدى تولىقتاي ءوزىمىز جاساپ, كوبىرەك شەتەلگە ەكسپورتتاۋ. ونىڭ ىشىندە, ۇلتتىق سۋسىنداردىڭ دا ەكسپورتىن جولعا قويۋ قاجەت. قالا ەكونوميكاسىنا جەرگىلىكتى جانە شەتەلدىك ينۆەستورلار بىردەي قارجى قۇيىپ جاتىر. بۇل مەگاپوليس الەۋەتىنىڭ ارتۋىنا زور مۇمكىندىك. ءونىدىرىس دامىماي, ەكونوميكا العا جىلجىمايدى. سول ءۇشىن قالا اكىمدىگى وتاندىق, شەتەلدىك ينۆەستيتسيالىق كومپانيالارعا بىردەي اشىق. ينۆەستورلارعا مەملەكەت تاراپىنان جاقسى جاعداي جاسالعان. يندۋستريالدى ايماقتان, كولىك-لوگيستيكالىق ورتالىعىنان جەر تەلىمدەرى بەرىلەدى, كاسىپورىن اۋماعىنا دەيىن ينفراقۇرىلىمدىق جۇيەلەر مەملەكەت ەسەبىنەن تەگىن تارتىلادى, كوممۋنالدىق قىزمەت تۇرلەرىنە ارنايى تاريف بەلگىلەنگەن, سالىق بويىنشا دا كوپتەگەن جەڭىلدىك بار. سوندىقتان شىمكەنتتى كاسىپكەرلەردىڭ بيزنەسىن دامىتۋعا وتە قولايلى قالا دەۋگە بولادى», دەدى ت.ىسقاقوۆ.