پەتروپاۆل. 6 مامىر. سولتۇستىك قازاقستان وبلىسى ەسىل اۋدانىنا قاراستى جالەل قيزاتوۆ اتىنداعى اۋىلشارۋاشىلىق كوللەدجىندە بەلگىلى مەملەكەت جانە قوعام قايراتكەرى بايكەن اشىموۆكە مەموريالدىق ەسكەرتكىش قويىلدى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى.
بايكەن ءاشىم ۇلى 1935-1938 جىلدارى ارالىعىندا وسىنداعى لەنين اۋىل شارۋاشىلىعى تەحنيكۋمىندا وقىعان. كەيىن لەنينگراد قولدانبالى زوولوگيا ينستيتۋتىن, جوعارى پارتيا مەكتەبىن بىتىرگەن.1942-45 جىلدارى ۇلى وتان سوعىسىنا قاتىسىپ,وتتى جىلداردىڭ اششى ءدامىن تاتقان. مايداننان ورالعاننان كەيىن ايىرتاۋ, زەرەندى اۋداندارىندا, كوكشەتاۋ, قاراعاندى, تالدىقورعان وبلىستارىندا پارتيا كوميتەتتەرىن باسقارعان. مينيسترلەر كەڭەسىنىڭ, جوعارعى كەڭەس پرەزيديۋمىنىڭ توراعاسى بولدى. تاۋەلسىزدىك جىلدارى ەلباسىمىزدىڭ باستامالارىن قىزۋ قولداپ, ماڭىزدى وقيعالاردىڭ باسى-قاسىندا ءجۇردى.
مەموريالدىق ەسكەرتكىشتىڭ اشىلۋ سالتاناتىندا وبلىس اكىمى ەرىك سۇلتانوۆ, قازاقستان حالقى اسسامبلەياسىنىڭ مۇشەسى اناتولي باشماكوۆ, قازاقستاننىڭ ەڭبەك ەرى گەننادي زەنچەنكو, اقىن ءمۇتاللاپ قانعوجين, مارقۇمنىڭ ۇلى, سقمۋ-ءنىڭ رەكتورى وڭداسىن ءاشىموۆ سويلەپ, ءومىرى تۇتاس ءبىر ءداۋىردى قامتىعان, ارقاشان حالقىنىڭ, ەلىنىڭ يىعىنا تۇسكەن سىناقتاردىڭ الدىڭعى قاتارىندا بولعان تانىمال تۇلعا جايلى ەستەلىكتەر ايتتى. ادامگەرشىلىك قاسيەتتەرى, ءبىلىمى مەن دانالىعىنىڭ ارقاسىندا بايكەن ءاشىموۆتى « ۇلى قازاق دالاسىنىڭ اقساقالى», دەپ اتاپ كەتكەن.
ايتۋلى شارادان سوڭ مەيماندار كوللەدجدىڭ مۇراجايىن ارالاپ, مەملەكەت, قوعام قايراتكەرى جايلى جادىگەرلەرمەن تانىستى.
ءومىر ەسقالي.
دەرەك, سۋرەت: سولتۇستىك قازاقستان وبلىستىق اكىمدىگىنىڭ ءباسپاسوز قىزمەتى.