قازاقستاندا 4 جانە 5 بالالى وتباسىلار كوپبالالى وتباسىلارعا ارنالعان مەملەكەتتىك جاردەماقىدان ايىرىلۋى مۇمكىن دەگەن اقپارات شىندىققا جاناسپايدى. بۇل تۋرالى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ حابارلايدى.
مينيسترلىكتىڭ تۇسىندىرۋىنشە, بىرقاتار بۇقارالىق اقپارات قۇرالدارىندا, مەسسەندجەر توپتارىندا جانە الەۋمەتتىك جەلىلەردە 6 جانە ودان دا كوپ بالاسى بار وتباسىلار عانا كوپبالالى وتباسى مارتەبەسىنە يە بولادى دەگەن جالعان مالىمەتتەر تارالۋدا.
قولدانىستاعى زاڭناماعا سايكەس, 4 جانە ودان دا كوپ كامەلەتكە تولماعان بالاسى نەمەسە 23 جاسقا دەيىنگى كۇندىزگى بولىمدە وقيتىن ستۋدەنت بالاسى بار وتباسىلار كوپبالالى وتباسى رەتىندە تانىلادى. مۇنداي وتباسىلارعا تابىسىنا قاراماستان اي سايىنعى جاردەماقى تولەنەدى.
2025 جىلى كوپبالالى وتباسىلارعا بەرىلەتىن جاردەماقىنىڭ مولشەرى بالانىڭ سانىنا قاراي سارالانىپ ەسەپتەلەدى:
4 بالاعا — 16,03 اەك نەمەسە 63 030 تەڭگە; 5 بالاعا — 20,04 اەك نەمەسە 78 798 تەڭگە; 6 بالاعا — 24,05 اەك نەمەسە 94 565 تەڭگە; 7 بالاعا — 28,06 اەك نەمەسە 110 332 تەڭگە; 8 جانە ودان دا كوپ بالاعا — ءار بالا ءۇشىن 4 اەك نەمەسە 15 728 تەڭگە تولەنەدى.سونىمەن قاتار, 6 جانە ودان دا كوپ بالا تۋىپ, تاربيەلەگەن انالارعا بەرىلەتىن ماراپاتتارعا بايلانىستى قوسىمشا جاردەماقى قاراستىرىلعان:
«كۇمىس القا» يەگەرلەرىنە — 6,40 اەك نەمەسە 25 165 تەڭگە; «التىن القا», «باتىر انا», I جانە II دارەجەلى «انا داڭقى» وردەندەرىمەن ماراپاتتالعاندارعا — 7,40 اەك نەمەسە 29 097 تەڭگە اي سايىن تولەنەدى.مينيسترلىك ازاماتتاردى تەك رەسمي اقپارات كوزدەرىنە سەنۋگە شاقىرادى جانە جالعان اقپارات تاراتۋدىڭ زاڭ الدىندا جاۋاپكەرشىلىككە تارتىلاتىنىن ەسكەرتەدى.