90 جاسىندا قازاقستانداعى اكۋشەرلىك جانە گينەكولوگيا سالاسىنىڭ نەگىزىن قالاۋشىلاردىڭ ءبىرى, اتاقتى دارىگەر, قوعام قايراتكەرى, اكادەميك نينا اميروۆنا كايۋپوۆا دۇنيەدەن ءوتتى, دەپ حابارلايدى Egemen.kz.
ءوزىنىڭ ۇزاق كاسىبي جولىندا ول 30 مىڭنان اسا نارەستەنىڭ ومىرگە كەلۋىنە كومەكتەسكەن. سونىمەن قاتار, عىلىمعا دا ولشەۋسىز ۇلەس قوستى: 25 عىلىم دوكتورىن, 40 عىلىم كانديداتىن دايارلاپ, 19 مونوگرافيا مەن 400-دەن استام عىلىمي ەڭبەك جازعان. سوڭعى جىلدارىنا دەيىن عىلىمي-زەرتتەۋ مەن قوعامدىق جۇمىستى بەلسەندى اتقارعان.
نينا كايۋپوۆا – ەلىمىزدەگى اكۋشەرلىك, گينەكولوگيا جانە پەريناتولوگيا عىلىمي ورتالىعىن قۇرۋشىلاردىڭ ءبىرى. ول قازاقستاننىڭ جەتەكشى مەديتسينالىق مەكەمەلەرىن باسقارعان, جوعارعى كەڭەس پەن سەناتتا دەپۋتات بولعان, حالىقارالىق كونفەرەنتسيالارعا قاتىسىپ, ايەلدەر مەن جاستاردىڭ قۇقىقتارىن قورعاۋعا باعىتتالعان زاڭداردى ازىرلەۋگە بەلسەنە ارالاسقان.
ول «پاراسات» جانە II دارەجەلى «دوستىق» وردەندەرىمەن, پرەزيدەنتتىڭ بەيبىتشىلىك پەن رۋحاني كەلىسىم ءۇشىن مەملەكەتتىك سىيلىعىمەن, «قازاقستاننىڭ ەڭبەك سىڭىرگەن قايراتكەرى» اتاعىمەن جانە باسقا دا ماراپاتتارمەن, سونداي-اق الماتى قالاسىنىڭ قۇرمەتتى ازاماتى اتاعىمەن ماراپاتتالعان.