بۇگىن ۇكىمەت وتىرىسىنان كەيىن وتكەن ءباسپاسوز بريفينگىندە قر پرەمەر-ءمينيسترى ولجاس بەكتەنوۆ جۋرناليستەردىڭ ساۋالدارىنا جاۋاپ بەردى. ساۋالدىڭ ءبىرى – مەملەكەت باسشىسى قاسىم-جومارت توقاەۆتىڭ ورتا بيزنەستىڭ ەكونوميكاداعى ۇلەسىن 2029 جىلعا دەيىن 15%-عا جەتكىزۋ جونىندەگى تاپسىرماسىنا قاتىستى قويىلدى, دەپ حابارلايدى Egemen.kz.
ولجاس بەكتەنوۆ قازىرگى تاڭدا شاعىن جانە ورتا بيزنەستىڭ (شوب) جالپى ىشكى ونىمدەگى ۇلەسى 39%-دى قۇرايتىنىن اتاپ ءوتتى. ونىڭ ىشىندە شاعىن بيزنەستىڭ ۇلەسى – 32%, ال ورتا بيزنەستىڭ ۇلەسى – 7%.
«15%-عا دەيىن جەتكىزۋ مىندەتى بار. ول ءۇشىن مەملەكەت تاراپىنان بىرقاتار قولداۋ شارالارى قاراستىرىلعان. ونىڭ ءبارىن ىسكە اسىرامىز. مەن جاڭا «بايتەرەك» حولدينگى تۋرالى ايتىپ ءوتتىم. سول سياقتى ءبىز «دامۋ» قورى جانىنان ەكى كەپىلدىك بەرەتىن قور قۇردىق. ول دا ءوزىنىڭ وڭ اسەرىن بەرەدى دەپ ويلايمىز. بىراق بۇل وتە كۇردەلى جانە وتە ماڭىزدى ماسەلە. ەگەر ءبىز ورتا بيزنەستىڭ ءتيىستى ۇلەسىن قامتاماسىز ەتسەك, ول جالپى ەكونوميكالىق وسىمگە, ەكونوميكامىزدىڭ تۇراقتىلىعىنا وتە جاقسى اسەر ەتەدى دەپ ويلايمىز. سوندىقتان ۇكىمەت, جەرگىلىكتى اتقارۋشى ورگاندار وسى مىندەتتى ىسكە اسىرۋ ءۇشىن ۋاقتىلى جۇمىس ىستەپ جاتىر», دەدى پرەمەر-مينيستر.
ۇكىمەت باسشىسى ورتا بيزنەستى دامىتۋ – ەكونوميكانى ءارتاراپتاندىرۋ مەن تۇراقتى ءوسىمدى قامتاماسىز ەتۋدىڭ باستى تەتىكتەرىنىڭ ءبىرى ەكەنىن ايتتى.