قازاقستاندا مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىن جەتىلدىرۋ باعىتىندا ماڭىزدى زاڭ قابىلداندى. بۇل زاڭ حالىقتىڭ الەۋمەتتىك تۇرعىدان ءالسىز توپتارىن, اسىرەسە ءال-اۋقات دەڭگەيى داعدارىستىق جانە شۇعىل جاعدايدا تۇرعان ازاماتتاردى مەديتسينالىق كومەكپەن قامتۋدى كەڭەيتۋگە باعىتتالعان, دەپ حابارلايدى Egemen.kz.
2026 جىلدان باستاپ ءمامس جۇيەسىنە قوسىمشا 1 ميلليونعا جۋىق ادام قامتىلادى. بۇل — د جانە ە ساناتىنداعى, ياعني داعدارىستى جانە شۇعىل ءال-اۋقات دەڭگەيىندە تۇرعان ادامدار. ولار ءۇشىن ءمامس جۇيەسىندەگى جارنالاردى جەرگىلىكتى بيۋدجەتتەر ءوز موينىنا الادى. ياعني, بۇل ازاماتتار مەديتسينالىق كومەككە ءوز تابىسىنا قاراماستان, تەگىن جانە كەدەرگىسىز قول جەتكىزە الادى.
بۇل وزگەرىس ەلىمىزدەگى تابىسى تومەن حالىقتىڭ شامامەن 5%-ىنىڭ جوسپارلى مەديتسينالىق قىزمەتتەرگە قول جەتكىزۋ مۇمكىندىگىن ارتتىرادى. سونىمەن قاتار, جەرگىلىكتى اتقارۋشى ورگاندار وسى توپتاعى ازاماتتاردىڭ مەديتسينالىق كومەككە جۇگىنۋ فاكتىسى بويىنشا جارنا تولەۋگە مىندەتتەلەدى.
سونىمەن قاتار, زاڭدا رەسمي تىركەلگەن جۇمىسسىزدار ءۇشىن دە ءمامس جارنالارىن تولەۋ مىندەتى جەرگىلىكتى بيلىككە جۇكتەلەتىنى قاراستىرىلعان. بۇل قادام جۇمىسسىزدىقپەن كۇرەس جانە حالىقتى جۇمىسپەن قامتۋ شارالارىمەن تىكەلەي بايلانىستى. جاو (جەرگىلىكتى اتقارۋشى ورگاندار) ەندى جۇمىسپەن قامتۋ ساياساتىن ىسكە اسىرۋمەن قاتار, سول ازاماتتاردىڭ دەنساۋلىعىن قورعاۋعا دا جاۋاپتى بولادى.
قازىرگى تاڭدا ەلىمىزدە 16,9 ميلليون ادام نەمەسە 82,6% حالىق ساقتاندىرىلعان. ونىڭ ىشىندە 11,9 ميلليون ازامات (ياعني, 59,5%) جەڭىلدەتىلگەن ساناتتارعا جاتادى, ولاردىڭ ءمامس جارنالارىن مەملەكەت ءوزى تولەيدى.
سونىمەن بىرگە, شامامەن 3,4 ميلليون ادام ءالى دە ءمامس جۇيەسىنە كىرمەگەن. ونىڭ 2,4 ميلليونى — ءومىر ءسۇرۋ دەڭگەيى قاناعاتتانارلىق ازاماتتار بولسا, 1 ميلليونعا جۋىعى الەۋمەتتىك وسال, داعدارىستىق جاعدايداعى ازاماتتار. وسى ساناتتاعى ادامدار ءۇشىن ەندى ءمامس جۇيەسىنە قوسىلۋ جولى اشىق ءارى جەڭىل بولادى.
ەڭبەككە قابىلەتتى ازاماتتار ءۇشىن دە ءمامس جۇيەسىنە قوسىلۋ شارتتارى جەڭىل: ايىنا بار بولعانى 4 250 تەڭگە, جىلىنا — 51 000 تەڭگە. بۇل سوما تولىق مەديتسينالىق قىزمەتتەر پاكەتىن الۋ ءۇشىن جەتكىلىكتى.
2027 جىلدان باستاپ قازاقستان تولىققاندى ساقتاندىرۋ مودەلىنە ءوتۋدى جوسپارلاپ وتىر. بۇل مودەل مەملەكەتتىڭ, جۇمىس بەرۋشىلەردىڭ جانە ازاماتتاردىڭ ورتاق جاۋاپكەرشىلىگىنە نەگىزدەلگەن. اتالعان شارالار «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستە كوزدەلگەن ورتاق جاۋاپكەرشىلىك قاعيداتتارىن ىسكە اسىرۋعا مۇمكىندىك بەرەدى.