«استانا وپەرا» ساحناسىندا مادەنيەت جانە اقپارات مينيسترلىگىنىڭ قولداۋىمەن «وپەراليا» حالىقارالىق مۋزىكالىق فەستيۆالىنىڭ اياسىندا بالەت ترۋپپاسىنىڭ كەشى ءوتتى.
باعدارلامانى «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا ازىرلەدى. ەكى بولىمنەن تۇرعان بۇل كەش كورەرمەن قاۋىمعا كلاسسيكالىق ءارى زاماناۋي حورەوگرافيا جاۋھارلارىن ۇسىندى. وعان قوسا قازاق اۆتورلارىنىڭ شىعارمالارى شەتەلدىك شەبەرلەردىڭ تۋىندىلارىمەن ۇيلەسىمدى ۇندەستىك تاپتى. ەلوردا تۇرعىندارى وتاندىق ساحنانىڭ تانىمال جۇلدىزدارى – تەاتردىڭ جەتەكشى سوليستەرىنىڭ شەبەرلىگىن دە, جاس دارىنداردىڭ جەتىستىكتەرىن دە جوعارى باعالادى. وسى كەشتە ءوز ونەرلەرىن تەاتردىڭ پريماسى ءمادينا ونەرباەۆا, جەتەكشى سوليست ارمان ۋرازوۆ, سوليستەر سەرىك ناقىسپەكوۆ, ايبار توقتار, دياس قۇرمانعازى, ءمولدىر شاكىموۆا, بالەت ارتىستەرى كاميلا شاحمانوۆا, عازيزا مولداحمەت, كاميلا ورمانوۆا, نازيرا زاەتوۆا, جاقسىلىق ساۋقىمبەكوۆ جانە ترۋپپانىڭ باسقا دا بيشىلەرى كورسەتتى.
گالا-بالەت باعدارلاماسى اياسىندا ءبىرىنشى بولىمدە جاقسى تانىلعان كلاسسيكالىق نومىرلەر – يۋ.گريگوروۆيچتىڭ حورەوگرافياسىندا پ.چايكوۆسكيدىڭ «ششەلكۋنچيك» بالەتىنەن پا-دە-دە, ك.گولەيزوۆسكيدىڭ حورەوگرافياسىندا ۆ.جەلوبينسكيدىڭ مۋزىكاسىنا سىعان ءبيى جانە م.پەتيپانىڭ حورەوگرافياسىندا ر.دريگونىڭ «تاليسمان» بالەتىنەن پا-دە-دە ۇسىنىلدى. زاماناۋي حورەوگراف, «استانا وپەرا» ءسوليسى سۇلتانبەك عۇماردىڭ ەرەكشە قويىلىمدارى – «HasSak» ەتنو-فولكلورلىق توبىنىڭ مۋزىكاسىنا «توي باستار» مەن «كەمەل ادام» جانە «Turan» ەتنو-فولكلورلىق ءانسامبلىنىڭ وڭدەۋىندە اقتوتى رايىمقۇلوۆانىڭ مۋزىكاسىنا جازىلعان «ماڭگۇرت» شىعارماسى كەشتىڭ سانىنە اينالدى. بالەت ارتىستەرى ديريجەر ەربولات احمەدياروۆتىڭ جەتەكشىلىگىندەگى «استانا وپەرا» سيمفونيالىق وركەسترىنىڭ سۇيەمەلدەۋىمەن ونەر كورسەتتى. جاقىندا ماەسترو شىعارماشىلىق ۇجىمدى ديريجەر رەتىندە تولىقتىرعانىن ايتا كەتەيىك.
ال ەكىنشى بولىمدە كورەرمەن قاۋىمدى زاماناۋي نەمىس حورەوگرافى رايموندو رەبەكتىڭ قازاق ترۋپپاسى ءۇشىن ارنايى قويعان «How Long Is Now?» («قازىرگى ءسات قانشا ۋاقىتقا سوزىلادى؟») ءبىر اكتىلى بالەتى قۋانتتى. سپەكتاكل ۋاقىت اعىمى جانە ونى ادامنىڭ اقىل-پاراساتپەن قابىلداۋى تۋرالى فيلوسوفيالىق تولعامعا قۇرىلعان, مۇندا ارتىستەردىڭ ءۇش جۇبى ادامنىڭ ءومىر جولىنىڭ ءتۇرلى كەزەڭىن بەينەلەيدى. «استانا وپەراداعى» بالەت كەشى ادەتتەگىدەي كەرەمەت ءوتتى. نومىرلەر وتە تاماشا ورىندالدى, ترۋپپا ءمىنسىز تەحنيكانى, قوزعالىس مانەرلىلىگىن, كەرەمەت ارتىستىكتى جانە مۋزىكالىق شەبەرلىكتى كورسەتتى. ال ۇلتتىق نومىرلەر اسەر ەتكەنى ءسوزسىز», دەيدى كورەرمەن جامال نۇرقايىموۆا.
ەسكە سالا كەتەيىك, بۇل كەش «وپەراليا – 2025» فەستيۆالى اياسىنداعى سوڭعى بالەتتىك ءىس-شارا جانە بالەت ترۋپپاسىن جازعى دەمالىس كۇتىپ تۇر. ال 12–13 شىلدەدە «استانا وپەرا» ساحناسىندا حالىقارالىق فەستيۆالدى ءارى XII تەاترلىق ماۋسىمىن تۇيىندەيتىن دج.ءپۋچچينيدىڭ «تۋراندوت» ايگىلى وپەراسىنىڭ اۋقىمدى قويىلىمى ۇسىنىلادى.