بۇل تۋرالى استانا ءتۋريزمدى دامىتۋ ورتالىعىنىڭ باسشىسى ارتەم كۆاشۋك ورتالىق كوممۋنيكاتسيالار قىزمەتى الاڭىندا وتكەن ءباسپاسوز كونفەرەنتسياسىندا ايتتى, دەپ حابارلايدى Egemen.kz.
بۇگىندە حالىقارالىق ارتىستەر, ۇيىمداستىرۋشىلار مەن تۋريستەر تاراپىنان استانا قالاسىنا قىزىعۋشىلىقتىڭ ارتۋى بايقالىپ وتىر. ۇلتتىق ستاتيستيكا بيۋروسىنىڭ مالىمەتىنشە, بىلتىر ەلورداعا 1,5 ملن تۋريست كەلگەن, ونىڭ 350 مىڭى شەتەلدىك قوناقتار.
سپيكەردىڭ ايتۋىنشا بيىل ەلورداعا 1,7 ملن تۋريست كەلەدى دەپ كۇتىلىپ وتىر, ءبىرىنشى توقساندا 300 مىڭ تۋريست كەلگەن, ونىڭ 68 مىڭى – شەتەلدەردەن كەلگەن قوناقتار.
«استانا بۇگىندە ساياسي جانە ىسكەرلىك ورتالىق قانا ەمەس, سونىمەن قاتار بەلسەندى مادەني جانە وقيعالار الاڭىنا اينالىپ وتىر. Backstreet Boys كونتسەرتى سياقتى اۋقىمدى ءىس-شارالاردى وتكىزۋ قالاعا تولەم قابىلەتى جوعارى تۋريستەردى تارتادى, بۇل ەكونوميكانى ىنتالاندىرادى جانە حالىقارالىق قىزىعۋشىلىقتى ارتتىرادى», دەدى ارتەم كۆاشۋك.