دەپۋتاتتاردىڭ وڭىرلەرگە ساپارى جالعاسىپ جاتىر. ءماجىلىس دەپۋتاتى, «Amanat» فراكتسياسىنىڭ مۇشەسى قازىبەك الىشەۆ اقتوبە قالاسىنداعى «كەلەشەك مەكتەپتەرى» ۇلتتىق جوباسى اياسىندا سالىنىپ جاتقان ءبىلىم ورداسىنىڭ قۇرىلىسى بارىسىن باقىلادى.
جالپى وڭىردە اتالعان ۇلتتىق جوبا اياسىندا 11 400 وقۋشىعا ارنالعان 14 مەكتەپتىڭ قۇرىلىسى جوسپارلانعان. ونىڭ ەكەۋى بىلتىر عانا پايدالانۋعا بەرىلسە, جاڭا وقۋ جىلىنا دەيىن تاعى 3 200 ورىندىق ءتورت مەكتەپ بالالاردى قابىلدايدى. سونىڭ ءبىرى – اقتوبە قالاسىنداعى ساياجاي-1 تۇرعىن الابىندا سالىنىپ جاتقان 300 ورىندىق ءبىلىم ورداسى.
«بۇل مەكتەپ №50 مەكتەپتەگى ورىن تاپشىلىعى ماسەلەسىن شەشۋگە كومەكتەسەدى. سونىمەن قاتار زاماناۋي ءبىلىم بەرۋ مەكەمەسى سوڭعى تەحنولوگيالارمەن جابدىقتالىپ, بالالاردىڭ جان-جاقتى دامۋىنا تولىق مۇمكىندىك بەرەدى. جالپى, «كەلەشەك مەكتەپتەرى» جوباسى ارقىلى جىل سوڭىنا دەيىن ءۇش اۋىسىممەن وقىتۋ ماسەلەسى تۇبەگەيلى شەشىلەدى», دەدى ق.الىشەۆ.
ايتا كەتەيىك, جاڭا مەكتەپتىڭ قۇرىلىسى 2023 جىلى باستالعان. جوبانىڭ جالپى قۇنى – 3,53 ملرد تەڭگە, ال مەكتەپتىڭ اۋدانى – 6 059,77 شارشى مەتر. قازىرگى ۋاقىتتا قۇرىلىس جۇمىستارىنىڭ 90 پايىزى اياقتالىپ, قاجەتتى قۇرال-جابدىقتار جەتكىزىلىپ جاتىر.
سونداي-اق ءماجىلىس دەپۋتاتى مەملەكەتتىك ساتىپ الۋ تۋرالى زاڭىنا ەنگىزىلگەن وزگەرىستەر تۋرالى مالىمەت بەردى. ونىڭ ايتۋىنشا, EPC كەلىسىمشارتى قۇرىلىستاعى كەيبىر ولقىلىقتاردىڭ الدىن الادى.
حالىق قالاۋلىسى اقتوبە وبلىسىنداعى «جايسان» شەكارالىق بەكەتىنىڭ جۇمىسىن دا كورىپ قايتتى. بۇعان قوسا مارتوك اۋىلىندا بوي كوتەرىپ جاتقان ءورت ءسوندىرۋ دەپوسىنىڭ قۇرىلىسىن ارالادى. بۇل نىسان دا پارتيانىڭ جول كارتاسىنا سايكەس بيىل پايدالانۋعا بەرىلۋگە ءتيىس. دەپۋتات شالقار اۋدانىنا قاراستى بوزوي اۋىلىندا جەرگىلىكتى تۇرعىندارمەن كەزدەسىپ, سپورت كەشەنى, مەكتەپ, جازعى فۋتبول الاڭى جانە جول قۇرىلىسى سىندى وزەكتى ماسەلەلەر بويىنشا ۇسىنىستاردى تىڭدادى.
ال ءماجىلىس دەپۋتاتتارى دۇيسەنباي تۇرعانوۆ پەن ءادىل جۇبانوۆتار اتىراۋ وبلىسىنا ءىسساپارى اياسىندا ايماقتاعى «Karabatan utility solution» جشس ەلەكتر ستانساسىنىڭ جۇمىسىمەن تانىستى. قازىرگى تاڭدا قۋاتى 310 مۆت ەلەكتر ستانساسىنان KPI زاۋىتى تولىقتاي ءوز قۋاتىن الىپ وتىر. الداعى ۋاقىتتا جوسپار بويىنشا تاعى ەكى ۇلكەن زاۋىت وسى ستانساعا قوسىلادى. سونىمەن قاتار كەيىنگى جىلدارى شاعىن جانە ورتا كاسىپ يەلەرىنەن قۋات كوزىن الۋعا وتىنىشتەر تۇسە باستاعان. ول باستاپقىدا جوبادا بولماعاندىقتان, وسى ماسەلەنى شەشۋ ءۇشىن قۋاتى 165 مۆت ستانسانىڭ تەحنيكالىق-ەكونوميكالىق نەگىزدەمەسى دايىندالىپ, ساراپتامادان وتكەن. ەندى قارجى ماسەلەسى شەشىلسە, 2028–2029 جىلدارى ىسكە قوسىلادى دەپ جوسپارلانىپ وتىر.
«قىركۇيەك ايىندا جۇمىس باستالعاندا وسى ماسەلەلەردى كوتەرىپ, قولداۋ كورسەتىپ, قاجەت بولسا زاڭناماعا وزگەرىستەر ەنگىزەمىز. اتىراۋدا ىسكە قوسىلعانىنا 5 جىلداي ۋاقىت بولعان, ارنايى ەكونوميكالىق ايماققا ارنالعان ەلەكتر ستانساسى جۇمىسىمەن تانىستىق. جوبا بويىنشا زاۋىت, بىرىككەن ەنەرگو جۇيەلەرى, باتىس قازاقستان, اتىراۋ, ماڭعىستاۋ وبلىستارىنا ەنەرگيا كوزىن بەرىپ وتىرعان ستانساعا كەيىنگى جىلدارى شاعىن جانە ورتا كاسىپ يەلەرىنەن سۇرانىس ارتىپ, وسىعان وراي, قوسالقى ستانسا قۇرىلىسىن قارجىلاندىرۋعا كومەك سۇرايدى. بۇل ماسەلە شەشىمىن تابادى دەگەن ويدامىز», دەدى د.تۇرعانوۆ.
نەگىزى ستانسا وتە قۋاتتى ەلەكتر ەنەرگياسىن بەرەدى. ەندى شاعىن جانە ورتا كاسىپ يەلەرى ءۇشىن پايدالانۋعا جەتكىلىكتى دەڭگەيگە تۇسىرەتىن ترانسفورماتور قاجەت.
«بۇل جەر گاز-حيميا باعىتىنداعى ارنايى ەكونوميكالىق ايماق بولادى دەپ قۇرىلدى, كاسىپكەرلەردى دە شاقىردىق. ەندى ولار قارجىسىن سالىپ, ءوندىرىسىن اشۋعا ەلەكتر قۋاتى جەتپەسە, بۇل بىزگە ۇلكەن سىن. قازىردىڭ وزىندە وسى جەردە 20 مۆت-عا سۇرانىس بار, ياعني 12 جوباعا نەبارى 1,1 ملرد تەڭگە قاراجات كەرەك. ارنايى ەكونوميكالىق ايماقتا بوس ورىن جەتەدى», دەدى ءا.جۇبانوۆ.
سونىمەن قاتار ماجىلىسمەن, «Respublica» پارتياسى فراكتسياسىنىڭ مۇشەسى دينارا ناۋموۆا شىمكەنت قالاسىنداعى №78 ايەلدەر كولونياسىنا, «وركەن» جەكە قايىرىمدىلىق قورىنا جانە «كومەك» تۇرمىستىق زورلىق-زومبىلىق قۇرباندارىنا كومەك كورسەتۋ ورتالىعىنا باردى.