اۋىل مەكتەپتەرىنىڭ الەۋەتى ارتىپ كەلەدى

اتالعان باعدارلاما ىشىندە اقتوبە وبلىسىندا «تسيفرلىق تەحنولوگيالاردى پايدالانا وتىرىپ شاعىن جيناقتى اۋىل مەكتەپتەرىنىڭ الەۋەتىن دامىتۋ», الماتى وبلىسىندا «جاراتىلىستانۋ-ماتەماتيكالىق باعىتتاعى پاندەر بويىنشا ءبىلىم بەرۋ ساپاسىن ارتتىرۋ», ماڭعىستاۋ وبلىسىندا «وتپان» تىرەك مەكتەپتەرىنىڭ جەلىسىن دامىتۋ», ۇلىتاۋ وبلىسىندا «Ustaz Ulytau» سياقتى وڭىرلىك باستامالار ىسكە اسىرىلىپ جاتىر.

ناقتى اتاعاندا, 2023 جىلى اقتوبە وبلىسىندا 12 تىرەك مەكتەپ پەن 134 شاعىن جيناقتى مەكتەپ, 2024 جىلى اقمولا, قوستاناي, پاۆلودار, باتىس قازاقستان, سولتۇستىك قازاقستان وبلىستارىندا تاعى 10 تىرەك جانە 30 شاعىن جيناقتى مەكتەپ جوباعا قاتىسقان.

جوبانى جۇزەگە اسىرۋ ناتيجەسىندە مەكتەپتەردىڭ ماتەريالدىق-تەحنيكالىق بازاسى جاڭارتىلىپ, زاماناۋي پاندىك جانە تسيفرلىق كابينەتتەرمەن جابدىقتالدى, سونداي-اق, جىلدامدىعى جوعارى ينتەرنەتپەن قامتاماسىز ەتۋ شەشىمىن تاپقان.

2025–2026 وقۋ جىلىندا تاعى 1600 اۋىل مەكتەبى قوسىلادى دەپ جوسپارلانىپ وتىر.

وقۋ-اعارتۋ مينيسترلىگىنىڭ ءباسپاسوز قىزمەتىنىڭ حابارلاۋىنشا جوبانىڭ ماڭىزدى تۇسىنىڭ ءبىرى – ونلاين وقىتۋ. وقۋشى مەن مۇعالىم سانى از اۋىل مەكتەپتەرىندە ماتەماتيكا, فيزيكا, حيميا, بيولوگيا, اعىلشىن ءتىلى پاندەرىنەن ونلاين ساباقتار وتكىزىلەدى.

«كەيبىر اۋىل مەكتەپتەرىندە ءبىر مۇعالىم بىرنەشە پاننەن ساباق بەرىپ ءجۇر. جاڭا جوبانىڭ ارقاسىندا تىرەك مەكتەپتەرىنىڭ ۇستازدارى شاعىن جيناقتى مەكتەپتەگى وقۋشىلاردى ونلاين وقىتادى, ياعني ءار پاننەن ءوز ءىسىنىڭ بىلىكتى مامانى ءدارىس بەرەدى. بۇل بالالاردىڭ ءبىلىم ساپاسىن جاقسارتىپ قانا قويماي, اۋىل مۇعالىمدەرىنىڭ دە كاسىبي بىلىكتىلىگىن ارتتىرۋعا مۇمكىندىك بەرەدى», دەدى ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى نازيپا ايۋباەۆا.

سونىمەن قاتار ادىستەمەلىك قولداۋ تۇرعىسىندا مۇعالىمدەرگە تسيفرلىق ساۋاتتىلىق كۋرستارى وقىتىلادى, تەحنولوگيالاردى قولدانۋ مەن وقۋ باعدارلامالارىن اۋىل مەكتەپتەرىنە بەيىمدەۋ بويىنشا ترەنينگتەر وتكىزىلەدى. بۇگىنگە دەيىن ۇيىمداستىرىلعان 10-نان استام رەسپۋبليكالىق ءىس-شارا الداعى ۋاقىتتا دا جالعاسادى.