ورال «زەنيت» زاۋىتى ءوزىنىڭ سۋ جاڭا كەمەسىنىڭ تۇساۋىن كەسىپ, ونى سۋعا ءتۇسىرۋ ءراسىمىن وتكىزدى. ايبىنى اسقاق شاراعا ەلىمىزدىڭ اسكەري-تەڭىز كۇشتەرى سالاسىنىڭ قىزمەتكەرلەرى مەن زاۋىت جۇمىسشىلارى جانە قالا تۇرعىندارى جينالدى.
تاۋەلسىزدىككە قول جەتكەن جىلداردان باستاپ «زەنيت» زاۋىتى ەلىمىزدەگى كەمە ءوندىرىسى سالاسىنىڭ كوشباسشىسى اتاندى. كاسپي تەڭىزىندەگى شەكارا تىنىشتىعىن كۇزەتۋگە اتتاناتىن زەنيتتىكتەر شىعارعان 23-ءشى كەمە. بۇل كەمەنىڭ ەرەكشەلىگى سۋ بەتىندە ۇزدىكسىز 3-5 تاۋلىككە دەيىن, ساعاتىنا 100 شاقىرىم جىلدامدىقپەن جۇزە الادى. سونىمەن قاتار, الەمدىك كەمە جاساۋداعى بارلىق تەحنولوگيالار ەسكەرىلگەن, قارۋى دا قۋاتتى. تەز قوزعالىپ, كۇرت بۇرىلا الاتىن «FC-19» كەمەسىنىڭ كۇشىمەن تەڭىز شەكاراسىن بۇزۋشىلار مەن زاڭسىز بالىق اۋلاۋشى تالاي قىلمىسكەردىڭ قۇرىقتالارى ءسوزسىز ەكەندىگىن ايتادى سالا ماماندارى.
– تەڭىز تىنىشتىعى, ونداعى ءتارتىپتى قاداعالاۋ بەرىك قولدا ەكەندىگىنە نىق سەنىمدىمىز. بۇگىنگى كۇنى مەملەكەتىمىزدىڭ ايبىنىن, قۋاتىن شىن مانىندە ارتتىراتىن, تۋعان ءوڭىرىمىز ءۇشىن كەۋدەمىزدە ماقتانىش سەزىمىن ۇيالاتاتىن تاعى ءبىر تاريحي وقيعانىڭ كۋاسى بولعالى وتىرمىز. تاۋەلسىز ەلىمىزدىڭ تىنىشتىعىن كۇزەتۋگە زور ۇلەستەرىن قوسىپ جۇرگەن «زەنيت» زاۋىتى قىزمەتكەرلەرىنە العىس ايتامىن. بۇگىنگى سۋعا تۇسىرىلگەلى وتىرعان كەمەمەن ونداعى شەكاراشىلارعا ءسات ساپار, اق جول تىلەيمىن, – دەدى قۇتتىقتاۋ سوزىندە باتىس قازاقستان وبلىسى اكىمىنىڭ ءبىرىنشى ورىنباسارى ارمان وتەعۇلوۆ.
سالتاناتتى شارادا ءسوز العان اسكەري-تەڭىز سالاسى قىزمەتكەرلەرى مەن زاۋىت باسشىلىعى دا كەمەگە ءساتتى ساپار تىلەدى. بۇدان سوڭ كەلگەن قوناقتار سۋعا تۇسىرىلگەن كەمەنى ارالاپ كوردى.
نۇربەك ورازاەۆ, جۋرناليست. تەمىر قۇسايىن, «ەگەمەن قازاقستان».
ورال.
سۋرەتتى تۇسىرگەن مەدەت دوسىموۆ.